Россия томонидан юк машиналарининг Россия ва Беларусь чегарасидан ўтишида янги тартиб жорий этилди, деб хабар бермоқда Транспорт вазирлиги ахборот хизмати.
Маълум қилинишича, 2024 йилнинг январь ойидан бошлаб Беларусь-Россия чегарасидаги “Красная горка”, “Рудня”, “Красний камен” назорат пунктларидан учинчи давлат фуқароларининг ўтиши чекланди. Янги тартибга мувофиқ икки давлат чегарасидан фақат Россия ва Беларусь фуқаролари эркин ўтиши (кириш ва чиқиш) мумкин.
Ушбу тартиб автотранспортда халқаро юк ташувларини амалга ошираётган ҳайдовчиларга ҳам тегишли. Учинчи давлат (шу жумладан ЁИИга аъзо давлатлар) фуқаролари бўлган халқаро юк ташувлари фаолияти билан шуғулланувчи ҳайдовчилар Россия Федерациясига кириши ва мамлакатни фақат халқаро чегара-назорат пунктлари орқали тарк этиши мумкин.
Янги тартибнинг жорий этилиши ортидан учинчи давлат, хусусан, Ўзбекистон фуқаролари бошқарувида бўлган юк машиналарининг Россия-Беларусь чегарасида тўпланиб қолиш ҳолати кузатилди. Юзага келган мазкур ҳолат Ўзбекистон ва Беларусь ҳамда Россия транспорт вазирликлари раҳбарияти даражасида муҳокама этилди.
Транспорт вазирлиги раҳбарияти томонидан ушбу ҳолатда миллий ташувчилар манфаатларини инобатга олган ҳолда Ҳукумат даражасида ечим топиш юзасидан дипломатик каналлар орқали музокаралар олиб борилмоқда.
Изоҳ (0)