Сирдарё ва Хоразм вилоятларида пул эвазига ҳайдовчилик гувоҳномасини олиб беришни ваъда қилган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Сирдарё тумани бўлимлари томонидан тезкор тадбир ўтказилган. Тадбирда М.А. исмли шахс фуқаро Ф.Г.га гўёки ЙҲХБда ишловчи танишлари ёрдамида “Б” тоифадаги ҳайдовчилик гувоҳномасини олиб бериши эвазига 700 доллар ва 1,2 миллион сўмни олган вақтида ашёвий далиллар билан ушланган.
Шу каби, департаментнинг Хоразм вилоят бошқармаси томонидан ўтказилган тезкор тадбирда С.Н. исмли шахс фуқаро М.Р.ни гўёки ЙҲХБда ишловчи танишлари ёрдамида ҳайдовчилик гувоҳномасини олиш учун бўлиб ўтадиган имтиҳондан ўтказиб қўйиши эвазига 7 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида бўлса, Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)