“Капитал суғурта” АЖнинг молиявий ҳисоботларини ўрганиш натижаларига кўра, қонунчилик ҳужжатларида белгиланган меъёрларга риоя қилинмаганлик фактлари аниқланиб, 162 миллион сўм миқдорида жарима солинди. Бу ҳақда Истиқболли лойиҳалар миллий агентлиги хабар берди.
Бундан ташқари, “Суғурта фаолияти тўғрисида”ги қонуни 47-моддаси, “Лицензиялаш, рухсат бериш ва хабардор қилиш тартиб-таомиллари тўғрисида”ги қонуннинг 32-моддаси, Махсус электрон тизим орқали айрим фаолият турларини лицензиялаш тартиби тўғрисидаги Ягона низомнинг 41-банди ҳамда Истиқболли лойиҳалар миллий агентлигининг тегишли қарорига асосан “Капитал суғурта” АЖга суғурта фаолиятини амалга ошириш бўйича берилган 2022 йил 22 ноябрдаги 049696-сонли лицензия 11 январь санасидан бошлаб 10 кун муддатга тўхтатилган.
“Капитал суғурта” АЖ лицензиясининг амал қилишини тўхтатиб туриш муддати даврида янги суғурта (қайта суғурта) шартномаларини тузиш, амалдаги суғурта (қайта суғурта) шартномаларини узайтириш тақиқланади.
“Капитал суғурта” АЖ илгари тузилган суғурта (қайта суғурта) шартномалари бўйича ўз зиммасига олган мажбуриятларни белгиланган тартибда бажариши шарт, — дейилади хабарда.
Аввалроқ Binance халқаро криптобиржаси Ўзбекистонда лицензиясиз ишлагани учун жаримага тортилгани тўғрисида хабар берилганди.
Изоҳ (0)