Футбол бўйича Осиё Кубоги мусобақаси 12 январь куни старт олади.
“Дарё” ушбу мусобақа олдидан футбол оламига алоқадор мутахассислардан Ўзбекистон терма жамоасининг турнирдаги иштирокидан нима кутаётгани ҳақидаги фикрларини сўради.
Ҳозирда Ўзбекистон футбол ассоциациясида фаолияти юритаман, шунинг учун миллий терма жамоасидан умидим катта. Шу жамоани қайсидир маънода аъзосиман десам ҳам бўлади. Лекин бу умид билан параллел равишда ишонч ҳам бор. Сабаби, терма жамоани тайёргарлик жараёнини кузатяпман, бош мураббий Сречко Катанеснинг ёндашувини кузатяпман, футболчиларнинг ўзини ҳам бу турнирдан кўп нарса кутаётганини биламан. “Боримизни берамиз, албатта, ижобий натижа қайд этамиз” деган ижобий ёндашув бор бутун жамоада. Шунингдек, ҳамжиҳатлик, иноқлик ҳам бор. Бу, айниқса, терма жамоада катта рол ўйнайди. Клубда-ку, аҳиллик бўлмаган тақдирда ҳам улар бутун мавсум бирга ўйнайверганидан кейин кўникмалар ҳосил бўлиб, жамоа сифатида шаклланиб бораверади. Терма жамоада эса айнан кайфият кўп нарсани ҳал қилади. Ҳар хил клублардан келадиган футболчилар йиғилиб, қисқа муддатда аҳил жамоа ҳосил қилиши натижаларда катта рол ўйнайди.
Ҳозирги кунда Осиё терма жамоаларининг савияси бир-бирига яқин бўлиб кетган. Шунинг учун тахмин қилиш қийинроқ. Ўйлашимча, камида ярим финалгача боришга кучимиз етади. Тўғри, жамоа сардори ва терма жамоа тарихидаги энг яхши тўпурар Элдор Шомуродовнинг йўқлиги катта йўқотиш бўлади. Бошқа ҳужумчилар энди юзага келган вазиятдан фойдаланиши зарур. Энди улар Шомуродовнинг йўқлигини билдирмасдан, бор кучини сарфлашига умид қиламан. Балки, тарихимизда биринчи бор чемпионликни қўлга киритармиз!
Даврон Файзиев, ЎФА матбуот ва медиа раҳбари
Элдор Шомуродов жуда катта йўқотиш бўлди Ўзбекистон терма жамоаси учун. Лекин бошқа томондан олиб қарасак, гуруҳ босқичида унинг ўрнини билдирмайдиган футболчилар бўлиши мумкин. Ярим ҳимояда ҳам голлар урадиган кўплаб футболчилар бор. Агар гуруҳда 2-ўринни оладиган бўлсак, нимчорак финалда Таиланд, Уммон ёки Қирғизистон билан эҳтимолий ўйинлар бўлиши мумкин. Албатта, Саудия Арабистони у гуруҳда биринчи ўринни олса. Уларга қарши ҳам Элдорсиз ўйнаса бўлади, менимча.
Чорак финалга етиб бориш имкониятимиз жуда катта. Битта ўйинда кўп нарса бўлиши мумкин. Балки, ярим финалга ҳам қийинчиликсиз чиқишимиз мумкин. Албатта, турнирда сюрпризлар бўлиши, табиий. Масалан, биз кутаётган терма жамоалар плей-оффга чиқмаслиги мумкин. Балки, чорак финалда фаворитлар эмас, умуман кутмаган терма жамоаларга қарши ўйнармиз. Шахсий фикрим, камида чорак финалга қадар етиб борамиз.
Алишер Никимбаев, футбол мутахассиси, Қатар футбол ассоциацияси мутасаддиси
Миллий терма жамоамиздан бўлажак Осиё Кубогида катта натижа кутмаяпман. Агар чорак финалгача етиб борсак, биз учун максимум натижа бўлади, деб ҳисоблайман. Тўғри, сўнгги ўйинларда терма жамоада характер пайдо бўлгани, жисмоний жиҳат анча яхшиланганини кўриш мумкин.
Футболчиларимиз кетма-кет аввал деярли кузатилмаган натижа — камбекларни амалга оширишди. Лекин бир қатор чизиқлардаги муаммолар ҳалигача бартараф этилмагани учун терма жамоадан катта натижа кутиш қийин деб ҳисоблайман. Масалан, дарвоза чизиғимиз энг катта муаммоимиз. Бунинг устига, ҳимоя ҳам даражаси бир-биридан катта фарқ қиладиган футболчилардан ташкил топган. Шомуродовни жароҳат олганини инобатга оладиган бўлсак, энг ишонганимиз — ярим ҳимоя. Ўзи умуман олганда, Ўзбекистонда ярим ҳимояда ҳеч қачон муаммо бўлмаган. Лекин биргина ярим ҳимоя билан натижага эришиш қийинлигини тарих кўп бор исботлаган.
Пессимист бўлмоқчи эмасман. Лекин шахсан мен учун терма жамоа Эрон билан иккинчи бўлимдагидек ўйнаб, катта натижага эришолмаса ҳам майли. Муҳими, ҳақиқий жангчилардек охиригача курашиб, сифатли футбол намойиш қилиш лозим.
Ёқубжон Бобожонов, собиқ футбол шарҳловчиси
Ҳозир Осиё футболида рақобат анча ўсган. Сўнгги Осиё Кубогидан кейинги вақт ичида бир неча терма жамоаларда кескин ўсиш кузатилди деб ўйлайман. Масалан, Япония терма жамоаси. Японлар доим қитъада етакчилар қаторида бўлиб келгани рост, аммо ҳозирги таркиб билан улар, менимча, Жаҳон Чемпионатларида ҳам юқори натижа учун даъвогар бўла олишади. Яна Саудия Арабистони футболида бўлаётган инқилобий ўзгаришлар нафақат минтақа ёки қитъа, балки дунё даражасида ҳам спорт тури сифатида футболга таъсир ўтказмоқда. Билмадим, бўлажак Осиё Кубогида бу қанчалик сезилади, аммо саудияликларда ҳам иштиёқ баланд экани аниқ.
Ўз севимли жамоамизга келсак, 2019 йил БААда ўтган турнирдан сўнг биз ўсишга эришдикми ёки йўқ, буни дарҳол айтиш жуда қийин. Орада пасайиш бўлгани эса аниқ, чунки тарихда илк бор мундиал саралашининг сўнгги 3-босқичига чиқа олмадик. Кейинроқ жамоани ҳозирги мураббий Сречко Катанес қабул қилиб олди. Словениялик мутахассисда 2,5 йил жиддий расмий ўйинлар саноқли бўлди. Ўртоқлик ўйинлари билан эса муаммо кузатилмади. Унга барча шароитлар яратилди, назаримда. Бу турнир Катанес учун ростмана биринчи синов бўлади. Албатта, Элдор Шомуродовнинг кутилмаганда сафдан чиқиши катта йўқотиш ҳисобланади. Бироқ мураббийнинг бор даражаси баъзан мана шундай вазиятларда кўриш мумкин бўлади. Очиғи, мутахассис Элдорсиз қандай кўринишда ўйнаши менга жуда қизиқ.
Натижа бўйича тахмин қилишга жуда қийналаман, аммо кутилмаларимнинг юқори чегараси 1/2 финал бўлиб, ярим финалга чиқиш биз учун имконли ва яхши натижа бўларди, деб ўйлайман. Айни вақтда гуруҳдаги ўйинларга, ҳар бир учрашувга диққат ва бор энергия билан ёндашишимиз зарур, бошқачасига, дейлик ярим куч билан ўйнаб ютадиган терма жамоа бу турнирда йўқ, менимча.
Аббос Файзуллаев турнирни қандай ўтказишига кўпчилик қатори мен ҳам қизиқяпман. Ундан тўғри фойдаланган тақдирда Катанес мавжуд муаммоларни бемалол ечиши мумкин. Яна Жалолиддин Машариповдан ҳам кутилмаларим юқори. Унинг харизмаси борлигини, машғулотлар ва ўйинларни етакчи руҳида ўтказиши биламиз. Машариповнинг ҳам исботлаши керак бўлган нарсалар кўп деб ўйлайман.
Барча ватандошлар қатори миллий жамоамизга омад тилайман. Муваффақиятни ҳаммадан кўп футболчиларимизнинг ўзлари исташини жуда яхши биламан. Шу истакларига эришиб Ватанга қайтишсин!
Ориф Толипов, футбол шарҳловчиси
Изоҳ (0)