АҚШ Россиянинг 300 миллиард долларлик музлатилган активларини мусодара қилиш имкониятлари ва хатарларини ўрганиб чиқишни G7 давлатларига таклиф қилди, деб ёзади Financial Times манбаларга таяниб.
Унга кўра, G7 молия вазирлари ва уларнинг ўринбосарлари декабрь ойида активларни мусодара қилиш механизмини ишлаб чиқиш ва улар билан боғлиқ рискларни баҳолашни муҳокама қилишган.
АҚШ Буюк Британия, Япония ва Канада кўмагида 2024 йил февралида бўлиб ўтиши мумкин бўлган G7 етакчиларининг учрашувида барча вариантларни кўриб чиқиш учун тайёргарлик ишларини давом эттиришни таклиф қилди.
“Вашингтон томонидан таклиф этилган учта ишчи гуруҳ мусодара қилишнинг ҳуқуқий жиҳатларини, бундай сиёсатни қўллаш усулларини ва рискларни камайтиришни, шунингдек, ушбу активларни Украинага йўналтириш вариантларини ўрганиб чиқади”, — деб таъкидлайди газета.
Шу билан бирга, Германия, Италия, Франция, шунингдек, ЕИнинг бошқа вакиллари ҳар қандай қарор қабул қилишдан олдин Россия активлари мусодара қилиниши қонунийлигини синчковлик билан баҳолаш зарурлигини маълум қилишган.
Изоҳ (0)