Исроил мудофаа кучлари 8 январь куни Сурияда Фаластиннинг ҲАМАС гуруҳи юқори мартабали аъзосини йўқ қилгани ҳақида хабар берди. Идорага кўра, Ҳасан Акаше “сўнгги ҳафталарда Сурия ҳудудидан Исроилга қилинган ракета ҳужумларининг асосий ташкилотчиларидан бири” эди.
Акаше Суриянинг Байт Жин ҳудудида йўқ қилинган, Исроил томони ҳозирча операциянинг бошқа тафсилотларини ошкор қилмади. Идора матбуот хизмати Исроил “Сурия ҳудудидан амалга ошириладиган террорчилик ҳаракатларига тоқат қилмаслигини” қайд этди.
8 январь куни эрталаб Ливан жанубида исроилликларнинг зарбаси оқибатида “Ҳизбуллоҳ” ҳаракатининг юқори мартабали қўмондони ҳалок бўлганди. AFP манбасига кўра, Виссам ат-Тавил “Ҳизбуллоҳ”нинг Ливан жанубидаги ҳарбий амалиётларини бошқаришда етакчи роль ўйнаган. Унинг ўлдирилиши Ғазо секторидаги уруш бутун Яқин Шарққа тарқалиши мумкинлиги бўйича хавотирларни кучайтирди, дейди агентлик манбалари.
2 январь куни ҲАМАС етакчиларидан яна бири Солиҳ ал-Арурий Исроил учувчисиз учоқларининг Байрут чеккасидаги Даҳия шаҳрига берган зарбаси оқибатида ҳалок бўлганди.
Изоҳ (0)