Хурракни тўхтатувчи ёстиқ, митти таржимон: Лас-Вегасда CES-2024 халқаро маиший электроника кўргазмаси бўлиб ўтмоқда (видео)

8 январь, душанба куни Лас-Вегасда дунёдаги энг йирик Маиший электроника кўргазмаси (CES) бошланди. Кўргазмада, аввал тахмин қилинганидек, сунъий интеллект (АI) ва автомобиль технологияси асосий мавзулар бўлмоқда. CES 100 000 га яқин ташриф буюрувчиларни жалб қилади, унда дунёнинг энг йирик технология компаниялари, жумладан, Sony, Google, Samsung ва бошқаларнинг янги гаджетлари намойиш этилади ва асосий саноат тенденциялари муҳокама қилинади.

Лас-вегасдаги Маиший электроника кўргазмасида “Дарё” интернет нашри вакили ҳам иштирок этмоқда.

2023 йил давомида ChatGPT каби генератив АI воситаларининг пайдо бўлиши ортидан мутахассислар бу йилги кўргазма АI асосида ишлайдиган маҳсулотлар билан тўлиб кетишини тахмин қилмоқда, чунки катта ва кичик фирмалар одамларнинг технологияга қизиқиши ортиб бораётганидан фойдаланиб маҳсулот тақдим қилишга интилмоқда.

Кўргазма иштирокчиларидан бири АI ёрдамида ишлайдиган ақлли ёстиқни тақдим этди. Ёстиқ хурракни тўхтатишга ёрдам беради. Ёстиқ ичидаги сунъий интеллект сизнинг хуррак овозингизни эшитганида унинг ҳаво тозалагич қисми ишга тушади, ёстиқ бошингизни секин буриб қўяди, натижада сизга тоза ҳаво етиб боради. Буларнинг ҳаммаси сизни уйғотиб юбормасдан амалга оширилади.

Hyundai, Kia ва Mercedes-Benz бу йилги тадбирда Nvidia ва Qualcomm каби футуристик автомобилларни қўллаб-қувватлашга йўналтирилган компаниялар билан бир қаторда асосий экспонентлар сифатида қайд этилган.

Бундан ташқари, ҳар йили бўлгани каби бу сафар ҳам кўргазмада телевизорлар ва ақлли Маиший техника каби анъанавий истеъмолчи электрон қурилмалари иштирок этмоқда.

Улардан бири инсон омилисиз икки дақиқада музқаймоқ тайёрлаб берадиган машина. Қурилмага музқаймоқ карамели қадоғи билан солинади. Машина қадоқдаги QR кодни ўқий олади ва шу асосда икки дақиқада мазали музқаймоқ тайёрлайди.

Шунингдек, иштирокчилардан бири 50 дан ортиқ тилда ишлайдиган митти таржимон қурилмани намойиш этди, қурилма телефон ва мобил иловаларсиз ишлайди. 

International Consumer Electronics Show (CES) — бу ҳар йили январь ойида Лас-Вегасда ўтказиладиган Маиший электроника кўргазмаси бўлиб, Consumer Electronics Association (CEА) томонидан қўллаб-қувватланади.

Биринчи CES 1967 йил июнь ойида Нью-Йоркда бўлиб ўтган. 1978 йилдан 1994 йилгача CES йилига икки мартадан ўтказилган: январь ойида Лас-Вегасда қишки Маиший электроника кўргазмаси (WCES) ва июнь ойида Чикагода ёзги Маиший электроника кўргазмаси (SCES).

1995 йилдан бери кўргазма Лас-Вегасда ўтказиб келинмоқда.