Афғонистон мудофаа вазири вазифасини бажарувчи Муҳаммад Ёқуб Мужоҳид мамлакатда “масжидлар, намозхонлар, диний мактаблар”га қилинган ҳужумларда чет эл фуқаролари, хусусан, Тожикистон фуқаролари иштирок этганини маълум қилди. Бу ҳақда Hasht-e Subh Daily хабар берди.
Мужоҳидга кўра, ўтган 12 ой давомида “Толибон” ўнлаб Тожикистон фуқароларини ўлдирган, яна юзлаб фуқаролар турли айбловлар билан ҳибсга олинган. Бироқ у ўлдирилган ва ҳибсга олинганларнинг аниқ сонини, шунингдек, уларнинг шахсини маълум қилмаган.
Шунингдек, Мужоҳид Афғонистондаги кўплаб терактларни уюштиришда Покистон фуқаролари ҳам иштирок этганини айтди.
“Кучларимиз амалиётида 20 дан ортиқ покистонлик ҳалок бўлди, яна юзлаб одамлар қўлга олинди”, — деди у.
Шу муносабат билан у минтақа давлатларидан “қуруқлик ва ҳаво чегараларини жиддий назорат қилишни” сўради. Ҳозирча Тожикистон расмийлари мазкур баёнотига жавоб бермаган.
2023 йил апрель ойида Тожикистон Миллий хавфсизлик давлат қўмитаси Афғонистондан келган жанговар гуруҳлар томонидан чегарани кесиб ўтишга уриниш ҳақида хабар берганди.
2023 йил сентябрь ойида Миллий хавфсизлик давлат қўмитаси Тожикистон ҳудудида Давлат мустақиллиги куни арафасида террорчилик ҳаракатлари содир этишни истаган “Жамоат Ансоруллоҳ” террорчилик гуруҳининг уч нафар аъзоси зарарсизлантирилганини яна бир бор эълон қилди.
“Ансоруллоҳ” гуруҳи Тожикистонда террорчи сифатида тан олинган, Афғонистонда фаолият юритади ва асосан Тожикистон фуқароларидан иборат.
Изоҳ (0)