Александр Лукашенко “Фуқаролик дронларини давлат рўйхатидан ўтказиш ва улардан фойдаланиш тўғрисида”ги фармонни имзолади, унга кўра Беларусь фуқароларига дронларни олиб кириш, сақлаш, сотиш, ишлаб чиқариш ва улардан фойдаланиш тақиқланади.
Фуқаролик дронларидан ҳар қандай мақсадда фойдаланишга фақат ташкилотлар ва юридик шахсларнинг “тадбиркорлик ва касбий фаолияти” учун рухсат этилади. Бунинг учун улар Беларусь Транспорт вазирлигининг Авиация бошқармасидан рухсат олиши керак.
Фармонда учувчисиз учоқларнинг давлат ҳисобини юритиш тизимини яратиш назарда тутилган.
Беларусь аҳолиси ўзларига тегишли бўлган дронларни олти ой ичида ташкилотларга сотиши ёки уларни “ҳукумат томонидан белгиланган ваколатли ташкилот”га сақлаш учун топшириши керак. Гап айнан қайси ташкилот ҳақида кетаётгани номаълум.
Аввалроқ Лукашенко қишда Ўзбекистонга ташриф буюришни режалаштираётгани ҳақида хабар берилганди. Лукашенко президент Шавкат Мирзиёев уни Ўзбекистонга таклиф қилаётганини айтган.