Тошкент вилоятининг Бўстонлиқ туманидаги Чимён тоғларидаги дам олиш масканларига автомобиллар ҳаракати 10 январга қадар бир томонлама ташкил этилади. Бу ҳақда ИИВ ЙҲХХ хабар берди.
Бир томонлама ҳаракат 4Р12 Тошкент—Чорвоқ ва 4Р6 Тошкент—Чирчиқ—Чимён (Ғазалкентдан кейин, Амирсой, “Чимён” ва “Билдирсой” дам олиш масканларига олиб борувчи) кесишмасидан 4Р6 ва 4Р10 йўллари кесишмасигача (Юсуфхона) ташкил этилган.
Шу билан бирга, 4Р10 йўли бўйлаб Чорвоқ сув омбори ёнидаги дам олиш масканларидан Юсуфхона чорраҳасига қайтиш мумкин.
“Байрам кунлари тирбандлик юзага келмаслиги учун Бўстонлиқ тумани ҳокими томонидан қарор қабул қилинди. Йўлларда тегишли белгилар ўрнатилди”, — дейилади хабарда.
ИИВ ЙҲХХ томонидан 1 январь куни эълон қилинган видеолардан кўриш мумкинки, вилоятдаги дам олиш масканларига элтувчи йўлларда бир оз тирбандлик юзага келган ва ЙПХ ходимлари уларни бартараф этиш, тартибни сақлаш бўйича иш олиб боришмоқда.
Изоҳ (0)