Тошкент вилояти Бўстонлиқ тумани тоғли Чимён қишлоғининг бир неча ҳудудларида бодом гуллади. Бу ҳақда “Ўзгидромет” ходими Алберт Попов ўзининг Facebook’даги саҳифаси орқали маълум қилди.
Чимён қишлоғи Тошкент вилоятининг денгиз сатҳидан 1700 метргача баландликда жойлашган ҳудудидир. Поповнинг билдиришича, ноябрь ойи Чимён кузатув пунктида ғайритабиий иссиқ кечган. “Кейинги йил энди бу бодомдан ҳосил кутмаса ҳам бўлаверади”, — деб ёзади у.
“Ўртача ойлик ҳаво ҳарорати +7,5 даража илиқ кузатилган. Кузатувлар даврида ўтмиш ноябрь ойлари бу қадар юқори иссиқликни тақдим этмаган” — дея қўшимча қилган Попов.
Ноябрь охирларида Бўстонлиқ тумани Оқтош массивида бодом гуллаган эди. “Ўзгидромет”га кўра, Ўзбекистонда 2023 йилнинг ноябри кузатувлар тарихидаги энг иссиғи бўлди. Барча ҳудудларда ҳарорат ўртача иқлимий меъёрдан 3-6 даража юқорироқ бўлган.
Изоҳ (0)