Тошкент вилоятида ҳоким ёрдамчиси 15 минг доллар пора олганида ушланди

Давлат хавфсизлик хизмати ходимлари томонидан ўтказилган тезкор тадбирлар давомида Тошкент, Андижон ва Навоий вилоятларида ноқонуний ер савдоларига чек қўйилди.

Хусусан, Юнусобод туманида яшовчи, муқаддам судланган 46 ёшли шахс Оҳангарон туманида “Илғор” МФЙ ҳудудида жойлашган ва давлат захирасида бўлган 10 гектар ер майдонини президент фармони билан тасдиқланган,“Ўзбекистон-2030” стратегиясининг 67-банди ижроси доирасида 10 йил муддатга ижарага олиб бериш эвазига тадбиркордан 80 минг доллар олганида ушланган.

Терговга қадар текширув давомида у мазкур маблағдан 15 минг долларни Оҳангарон тумани “Илғор” МФЙдаги ҳоким ёрдамчисига бериши кераклиги аниқланиб, ушбу мансабдор шахс ҳам сўралган пулни олган вақтида ашёвий далиллар билан ушланган.

Андижон вилоятининг Олтинкўл туманида яшовчи, муқаддам уч маротаба судланган 33 ёшли шахс алдов йўли билан ўзганинг ишончига кириб, унга тумандаги фермер хўжаликларидан бирига тегишли ер майдонидан 15 сотихи ўзига тегишли эканини айтган. У ер майдонига нисбатан расмийлаштирилган сохта ҳужжатларни кўрсатиб, келгусида мазкур ер майдонига нотурар жой сифатида ҳужжатлар тайёрлаб, унинг номида расмийлаштириб бериш эвазига 65 минг доллар талаб қилган.

ДХХ Андижон вилояти бўйича бошқармаси ходимлари томонидан департмент ходимлари билан ўтказилган тезкор тадбир давомида у сўралган пулдан 60 минг долларни олган вақтида ушланган.

Навоий вилоятида кузатилган ҳолатда Кармана туманидаги қишлоқ хўжалиги экинларини етиштиришга ихтисослашган МЧЖ раҳбари мазкур жамиятга қарашли 2,2 гектар ер майдонини харидорга 490 миллион сўмга сотишга келишган. У мансабдор танишлари ёрдамида ушбу ер майдонида уйлар қуриш учун рухсат олиб бериш эвазига 15 минг доллар талаб қилади.

ДХХнинг Навоий вилояти бўйича бошқармаси ходимлари томонидан ўтказилган тезкор тадбирда МЧЖ раҳбари 15 минг долларни олган вақтида ушланган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ Бухоро шаҳри “Абу Али ибн Сино” МФЙ ҳоким ёрдамчиси кредит маблағларини ўзлаштирганликда айбланиб, жиноят иши қўзғатилгани, Янгийўл тумани ҳокими маҳаллалардаги 6 нафар ёрдамчисини жазолагани тўғрисида хабар берилганди.