Украина тинчликка эришиш учун ўз ҳудудларининг бир қисмидан вақтинчалик воз кечиши керак. Spiegel нашрининг ёзишича, бу ҳақда Германиянинг Саксония федерал ҳудуди бош вазири Михаэл Кречмер маълум қилган.
“Сулҳга эришиш учун Украина аввало маълум ҳудудларга вақтинчалик кириш имкони йўқлигини тан олиши керак бўлади”, — деди у.
“Украина ҳудудининг бир квадрат метри ҳам Россияники бўлиб қолгани йўқ... Аммо, бошқа йирик урушларда бўлгани каби, якуний қарор қабул қилиш вақти келди”, — дея қўшимча қилди Кречмер.
У яна Германия ҳукумати “Украинани нафақат қурол-яроғ билан таъминлаши, балки дипломатик ташаббусларга ҳам киришиши” ва иттифоқчилар “Путинга таъсир ўтказиб, ўт очишни тўхтатишга имкон яратиш”га ҳаракат қилиши кераклигини айтиб ўтди.
Бундан ташқари, Кречмер Германиянинг Россияга нисбатан сиёсатида бурилиш зарурлигини таъкидлади.
“Россия бизнинг қўшнимиз. Хавфли, ҳаракатларини олдиндан тахмин қилиб бўлмайдиган қўшни. Россияни ҳарбий, сиёсий ва иқтисодий жиҳатдан заифлаштириб, бизга таҳдид солмайдиган қилиш ғояси 19-асрдан бошланган. Ҳозирда Россияга нисбатан бундай муносабат кейинги можаролар учун пойдевор яратади”, — деди у.
Изоҳ (0)