“Фирибгарликни бас қилинг!” — Садир Жапаров тадбиркорлар, инвесторлар ва давлат идораларига мурожаат қилди

Қирғизистон президенти Садир Жапаров инвесторларни алдашга чек қўйиш, давлат идораларини бюрократиядан халос бўлишга чақирди. Қирғизистон президенти тегишли мурожаатни ўзининг Facebook саҳифасида эълон қилди.

“Кейинги йилларда мамлакатимизга хорижий давлатлардан кўплаб инвесторлар кела бошлади. Албатта, бу бизни жуда хурсанд қилади. Чунки хорижий сармоясиз давлат ривожланиши қийин. Афсуски, айрим сармоядорлар хусусий тадбиркорлар томонидан алданиб, эндиликда улар ариза ёзмоқда. Албатта, ҳуқуқ-тартибот идоралари уларни ушлаб, пулни инвесторга қайтаради.

Лекин бу уларнинг зиммасига ортиқча юк бўлиб, юртимизнинг обрў-эътиборини бошқалар олдида тушириб юборади. Қирғизларда бир қошиқ заҳар бир бочка асални бузади, деган мақол бор. Орамизда шундай инсофсизлар бир қанча. Дўстлар, фирибгарликни тўхтатинг!” — деди Садир Жапаров.

Шунингдек, у инвесторларни имкон қадар Иқтисодиёт ва савдо вазирлиги, Инвестицияларни қўллаб-қувватлаш агентлиги каби давлат идоралари, вилоят, туман, қишлоқ ҳокимликлари раҳбарлари билан ҳамкорликда ишлашга чақирди. Жапаров давлат идоралари раҳбарларидан инвесторлар билан яқиндан ишлашни сўради.

“Бюрократия бўлмаслиги керак! Ҳудудингизга келаётган инвесторлар сони ва ҳажмидан келиб чиқиб, ҳар бирингизнинг меҳнатингизни баҳолаймиз”, — деди Қирғизистон раҳбари.