“Автомобиль йўллари илмий-тадқиқот институти” Синов лабораторияси бўлими бошлиғи Салоҳиддин Қурбонов “Дарё”га мурожаат қилиб, лаборатория Автомобиль йўллари қўмитаси томонидан тазйиққа учраётганини, лабораториянинг техник жиҳозлари ва бинолари қўмита томонидан олиб қўйилганини таъкидлади.
Синов лабораторияси бўлими бошлиғининг айтишича, Автомобиль йўллари қўмитасида раҳбарият алмашганидан сўнг қўмитанинг лабораторияга бўлган муносабати мутлақо ўзгариб қолган.
“Мен синов лабораториясида 15 йилдан ортиқ вақт давомида фаолият олиб келаман. Автомобиль йўллари қўмитасида раҳбарият алмашди. Мана шундан кейин қўмитанинг бизга бўлган муносабати мутлақо ўзгариб кетди. Қанчалик илм билан шуғулланганимиз сари, қўмита бизни олдимизда сунъий тўсиқлар қўя бошлади. Бу ҳам етмаганидек, биз фаолият олиб борадиган бино ва техникаларимиз олиб қўйилди. Бу ишларнинг таг замирида ҳеч қандай асос йўқ”, – дейди “Автомобиль йўллари илмий-тадқиқот институти” Синов лабораторияси бўлими бошлиғи Салоҳиддин Қурбонов.
Қурбоновнинг таъкидлашича, Ўзбекистон Республикаси Президентининг “2022 — 2026 йилларда Ўзбекистон Республикасининг инновацион ривожланиш стратегиясини амалга ошириш бўйича ташкилий чора-тадбирлар тўғрисида”ги қарорига кўра, Автойўл қўмитаси назоратида ва буюртмачилигида илмий-тадқиқот институти инновациялар бўйича 10 та тадқиқот ўтказиши, яъни 10 тажриба-синов майдони қуриши керак бўлган. Аммо, 2023 йилда қурилиши керак бўлган 6 та тажриба-синов майдонининг биронтаси барпо этилмаган.
“Йўл сиёсатини белгиловчи асосий идора – Автомобиль йўллари қўмитаси. Биз улар билан бир жамоа бўлиб ишлашимиз керак. Ҳозир бизни бинойимизни олиб қўйса, техникаларимизни олиб қўйса, биз қандай тадқиқот ўтказамиз? Агар лабораторияга молиявий босимлар давом этаверса, ходимларни ушлаб тура олмаймиз. Йил бошидан буён 30 нафар ходим ишдан кетди”, – деди Салоҳиддин Қурбонов.
“Дарё” мазкур ҳолат юзасидан Автомобиль йўллари қўмитаси билан боғланиб, ҳолат бўйича изоҳ сўради. Автомобиль йўллари қўмитаси раисининг биринчи ўринбосари Шуҳрат Назаровнинг таъкидлашича, қўмита лабораторияга ҳеч қандай тазйиқ ўтказмаган ҳамда Автомобиль йўллари илмий-тадқиқот институтининг техник жиҳозлари ва биносини ҳеч ким олиб қўймаган.
“Бу институтни Автомобиль йўллари қўмитаси, яъни биз тузганмиз. Ҳар йили бу институтга пул маблағлари ажратиб, лаборатория учун керакли бўлган ускуналарни харид қилиб берамиз. Биз шунча йиллик тадқиқот институтимизни ёпиб юборишга ёки унинг биносини олиб қўйишга уринмадик. Мана ходимлар ҳам бор, истасангиз улардан сўранг. Улар биз ўтирган бинода фаолият олиб боради”, – дейди Автомобиль йўллари қўмитаси раисининг биринчи ўринбосари.
Назаровнинг қайд этишича, ҳозирда қўмитага қарашли бўлган ташкилотларда трансформация (қайта ўзгариш, қайта ҳосил қилиш – таҳр.) жараёни бошланган. Қўмитанинг синов лабораторияси билан ҳеч қандай зиддияти йўқ.
“Ҳозир биз катта трансформация жараёнини бошладик. Янги-янги марказлар очилмоқда. Истаган ходим истаган марказга бориб иш бошлаши мумкин. Агар тадқиқот институтининг ходимлари кўчада ишсиз қолиб кетганида, бошқа гап бўлар эди. Лекин Автомобиль йўллари қўмитаси қошидаги ташкилотларда ишчиларнинг ишдан бўшаб кетиш ҳолатлари кўплаб топилади. Лаборатория бўйича ҳеч қандай зиддиятли ҳолатимиз йўқ. Қандай муаммо бўлиши мумкин? Ахир, лаборатория жойида турибди-ку”, – деди Автомобиль йўллари қўмитаси раисининг биринчи ўринбосари Шуҳрат Назаров.
Кўриб турганингиздек, мурожаатчининг гапларини расмийлар рад қилмоқда. Ким ҳақ-у, ким ноҳақ, дейишга бир оз шошмай турамиз. Чунки “Дарё” бу мавзуни ўрганишда давом этади.
Изоҳ (0)