“Avtomobil yo‘llari ilmiy-tadqiqot instituti” Sinov laboratoriyasi bo‘limi boshlig‘i Salohiddin Qurbonov “Daryo”ga murojaat qilib, laboratoriya Avtomobil yo‘llari qo‘mitasi tomonidan tazyiqqa uchrayotganini, laboratoriyaning texnik jihozlari va binolari qo‘mita tomonidan olib qo‘yilganini taʼkidladi.
Sinov laboratoriyasi bo‘limi boshlig‘ining aytishicha, Avtomobil yo‘llari qo‘mitasida rahbariyat almashganidan so‘ng qo‘mitaning laboratoriyaga bo‘lgan munosabati mutlaqo o‘zgarib qolgan.
“Men sinov laboratoriyasida 15 yildan ortiq vaqt davomida faoliyat olib kelaman. Avtomobil yo‘llari qo‘mitasida rahbariyat almashdi. Mana shundan keyin qo‘mitaning bizga bo‘lgan munosabati mutlaqo o‘zgarib ketdi. Qanchalik ilm bilan shug‘ullanganimiz sari, qo‘mita bizni oldimizda sunʼiy to‘siqlar qo‘ya boshladi. Bu ham yetmaganidek, biz faoliyat olib boradigan bino va texnikalarimiz olib qo‘yildi. Bu ishlarning tag zamirida hech qanday asos yo‘q”, – deydi “Avtomobil yo‘llari ilmiy-tadqiqot instituti” Sinov laboratoriyasi bo‘limi boshlig‘i Salohiddin Qurbonov.
Qurbonovning taʼkidlashicha, O‘zbekiston Respublikasi Prezidentining “2022 — 2026-yillarda O‘zbekiston Respublikasining innovatsion rivojlanish strategiyasini amalga oshirish bo‘yicha tashkiliy chora-tadbirlar to‘g‘risida”gi qaroriga ko‘ra, Avtoyo‘l qo‘mitasi nazoratida va buyurtmachiligida ilmiy-tadqiqot instituti innovatsiyalar bo‘yicha 10 ta tadqiqot o‘tkazishi, yaʼni 10 tajriba-sinov maydoni qurishi kerak bo‘lgan. Ammo, 2023-yilda qurilishi kerak bo‘lgan 6 ta tajriba-sinov maydonining birontasi barpo etilmagan.
“Yo‘l siyosatini belgilovchi asosiy idora – Avtomobil yo‘llari qo‘mitasi. Biz ular bilan bir jamoa bo‘lib ishlashimiz kerak. Hozir bizni binoyimizni olib qo‘ysa, texnikalarimizni olib qo‘ysa, biz qanday tadqiqot o‘tkazamiz? Agar laboratoriyaga moliyaviy bosimlar davom etaversa, xodimlarni ushlab tura olmaymiz. Yil boshidan buyon 30 nafar xodim ishdan ketdi”, – dedi Salohiddin Qurbonov.
“Daryo” mazkur holat yuzasidan Avtomobil yo‘llari qo‘mitasi bilan bog‘lanib, holat bo‘yicha izoh so‘radi. Avtomobil yo‘llari qo‘mitasi raisining birinchi o‘rinbosari Shuhrat Nazarovning taʼkidlashicha, qo‘mita laboratoriyaga hech qanday tazyiq o‘tkazmagan hamda Avtomobil yo‘llari ilmiy-tadqiqot institutining texnik jihozlari va binosini hech kim olib qo‘ymagan.
“Bu institutni Avtomobil yo‘llari qo‘mitasi, yaʼni biz tuzganmiz. Har yili bu institutga pul mablag‘lari ajratib, laboratoriya uchun kerakli bo‘lgan uskunalarni xarid qilib beramiz. Biz shuncha yillik tadqiqot institutimizni yopib yuborishga yoki uning binosini olib qo‘yishga urinmadik. Mana xodimlar ham bor, istasangiz ulardan so‘rang. Ular biz o‘tirgan binoda faoliyat olib boradi”, – deydi Avtomobil yo‘llari qo‘mitasi raisining birinchi o‘rinbosari.
Nazarovning qayd etishicha, hozirda qo‘mitaga qarashli bo‘lgan tashkilotlarda transformatsiya (qayta o‘zgarish, qayta hosil qilish – tahr.) jarayoni boshlangan. Qo‘mitaning sinov laboratoriyasi bilan hech qanday ziddiyati yo‘q.
“Hozir biz katta transformatsiya jarayonini boshladik. Yangi-yangi markazlar ochilmoqda. Istagan xodim istagan markazga borib ish boshlashi mumkin. Agar tadqiqot institutining xodimlari ko‘chada ishsiz qolib ketganida, boshqa gap bo‘lar edi. Lekin Avtomobil yo‘llari qo‘mitasi qoshidagi tashkilotlarda ishchilarning ishdan bo‘shab ketish holatlari ko‘plab topiladi. Laboratoriya bo‘yicha hech qanday ziddiyatli holatimiz yo‘q. Qanday muammo bo‘lishi mumkin? Axir, laboratoriya joyida turibdi-ku”, – dedi Avtomobil yo‘llari qo‘mitasi raisining birinchi o‘rinbosari Shuhrat Nazarov.
Ko‘rib turganingizdek, murojaatchining gaplarini rasmiylar rad qilmoqda. Kim haq-u, kim nohaq, deyishga biroz shoshmay turamiz. Chunki “Daryo” bu mavzuni o‘rganishda davom etadi.
Izoh (0)