“Кўча”нинг пулини бермаслик учун ертўлагача олиб тушишди— Азамат Аҳроров “Zo‘r TV” билан судлашгани ва Суғдиёна Азимовасиз фаолияти қандай давом этиши ҳақида гапирди (видео)

Актёр ва режиссёр Азамат Аҳроров “Дарё”нинг YouTube’даги каналига берган интервьюсида “Zo‘r TV” билан судлашгани, доимий партнёри Суғдиёна Азимованинг турмуш қургани фаолиятига қандай таъсир этиши ҳақида гапирди.

— “Кино олмаяпсизми?” деган гапни кўп эшитдим. Мен молиявий даромад олмаган тақдиримда ҳам йилига камида тўртта кино суратга оламан. Ҳозир тижорат фильмларидан фойда олиш жуда қийин. Шундай вазиятда ҳам санъат учун ижод қилишни тўхтатганим йўқ. Фақат орада бир муддат сериаллар суратга олишни ҳам йўлга қўйгандим. Аммо бу йўналишда ўзимни тополмадим. Биринчидан сериаллар учун жуда кам ҳақ тўланади, шу боис кам харажат қилиб, кўпроқ кадр олишга, кераксиз эпизодлардан фойдаланишга тўғри келади. Чунки сериалда эфир вақтини тўлдириш муҳим аҳамиятга эга. Иккинчидан балки телевидения раҳбарлари билмас, аммо уни қабул қилишда қўл остидагилар монополияга йўл қўяди. Ўзлари бирорта ижодий иш қилмай, олиб борилган серилни ерга уради.

Масалан, 2019 йили “Кўча” номли сериал суратга олганман. У фолиятимдаги энг оғир ва ғалвали ижодий иш бўлган десам бўлади. У пайтда доллар курси пастроқ эди, аммо уни тасвирга олиш учун 80 минг АҚШ доллари сарфлагандим. У пайтлари сериалларнинг ҳар бир қисмини 4 миллиондан сотиб олишарди. “Кўча”га катта маблағ сарфлаганим учун 12 миллиондан камига сотмаслигимни айтганман. Иккита канал талашиб, “Zo‘r TV” оладиган бўлди. Олтмиш қисмга шартнома тузганимиздан кейин 20 тасини эфирда бериб “Қолганини ололмаймиз”, деган. Қанақасига олмайсизлар, мен маблағ сарфлаб бўлганман, актёрларнинг ҳам ҳақини беришим керак, деганман. “Пул бермайман, нима қилсанг қил”, деб кўча одамлари билан қўрқитмоқчи бўлиб ертўлага олиб тушишган. Судга беришга мажбур бўлдим. Узоқ давом этган жараёнлардан сўнг судда ғолиб бўлдим ва менга берилиши керак бўлган маблағ тўлаб берилди, — дейди Азамат Аҳроров.

Азамат Аҳроров доимий партнёри Суғдиёна Азимованинг турмушга чиқиши ва нега бошқа актрисалар билан ҳамкорлик қилмаслиги ҳақида ҳам гапириб ўтди.

— Суғдиёнага кўп марта умр ўтяпти, турмушга чиқишингиз керак, деб гапирардим. Тақдирда ёзилган экан, Умра сафарига борганида жуфтини учратиб, тўйи бўлди. Унинг оила қурганидан жуда хурсандман, ҳозир унинг кинога қайтиши эмас, балки бахти ҳақида ўйлаяпман. Суғдиёнасиз ҳам ижодимиз давом этади. Ёнимдаги сценаристлар “ ‘Қайсаргинам 3’ ни қандай суратга оламиз?” деб сўради. Билмадим, балки у кино бўлар, балки бўлмас дедим. Назаримда у санъатдан кетган.

Шу кунгача Суғдиёна Азимовадан ташқари жуда кўп актрисалар билан ҳамкорлик қилганман. Бир марта ишлаб “қайта кинога таклиф этмайман” дейишимга кўп омиллар сабаб бўлган. Масалан, оилавий можаролар келиб чиқиши, феъл-атвори тўғри келмаслиги ёки касса ўзини оқламаслиги ҳам мумкин. Суғдиёна Азимовани 4-5 та кинога таклиф этдим. Фаолиятимдаги энг кассабоп фильмларда айнан у билан жуфтлик ролини ижро этганмиз, — дейди Азамат Аҳроров.

Суҳбатни тўлиқ ҳолда қуйида томоша қилинг.