Америка Қўшма Штатларининг Spirit Airlines авиакомпанияси хатолик сабаб, Форт Майерсга бувисининг олдига учиши керак бўлган олти ёшли Каспер исмли боланинг Oрландога учишига сабабчи бўлди.
Бу Каспернинг биринчи парвози ва у ёлғиз учган. Бола парвозга рўйхатдан ўтган, лекин нима учундир нотўғри самолётда учган. Аммо юклари тўғри манзилга борган.
Форт Майерс аэропортидан набирасини топа олмаган Мария Рамос Oрландогача 320 километрдан ортиқ йўлни босиб ўтишига тўғри келган. Авиакомпания харажатларни қоплашни таклиф қилди, лекин Мария нима сабабдан бундай бўлганини тушунтириб беришларини сўради.
“Улар менга телефон қилиб, нима сабабдан набирам Oрландога бориб қолганини тушунтириб беришларини хоҳлайман. Бу қандай содир бўлди? Уни бошқа самолётга ўтказишдими? Наҳотки стюардесса болани ойиси ҳужжатлари билан жойига ўтқазиб кетганидан кейин кетишига қараб турган”, — дейди Мария.
Якунда Spirit Аirlines авиакомпанияси байрам олдидан аэропортлардаги катта тирбандлик сабаб хатога йўл қўйганини тан олди. Шу билан бирга, 5 ёшдан 14 ёшгача бўлган болаларга мамлакат ичида катталар ҳамроҳлигисиз саёҳат қилиш имконини берувчи авиакомпания Каспернинг ундан кейинги сафарларида доимо ходим бўлишини таъкидлади.
Воқеа қайсидир маънода “Уйда ёлғиз-2” фильмининг сюжетини эслатиб юборади. Унда бош қаҳрамон 10 ёшли Кевин Маккаллистер тасодифан Нью-Йоркка учаётган самолётга ўтиради. Унинг оиласи ва қариндошлари Флоридага учиб кетаётган эди.
Аввалроқ тармоқларда “Уйда ёлғиз-3” фильмининг сохта, лекин реалликка яқин трейлери пайдо бўлган эди.
Изоҳ (0)