Рим шаҳрида итлар учун биринчи ресторан очилди

Римда барча турдаги итлар учун биринчи ресторан очилди. 

Ресторан Fuito деб номланган бўлиб, италянчадан таржима қилганда “ҳид билиш” деган маънони англатади. Унинг эгаси Марко Турано узоқ вақтдан бери ресторан бизнеси билан шуғулланади. Тўрт оёқли ҳайвонлар учун муассаса очиш ғоясини унга қиз дўсти таклиф қилган.

Итлар учун ресторан менюсини ишлаб чиқишда нафақат инсонларга овқат тайёрлайдиган ошпазлар, балки ветеринарлар ҳам иштирок этишди.

 

Газакка товуқ, мол, балиқ гўшти ёки сабзавотли боул таоми таклиф этилади. Асосий таомлар — картошка пюреси билан товуқ боккончини ёки рикотта ва қайнатилган қовоқ қўшилган треска балиғи. Итлар учун ҳатто махсус десерт ҳам бор — кўпиртирилган тухум оқига қовоқ пюреси ва қийма қўшилган торт.

Барча таомлар меҳмоннинг оғирлигидан келиб чиқиб кўпроқ ёки камроқ тортилади. Тўрт оёқли меҳмонлар учун ичишга энг яхши минерал сув берилади.

Ушбу ресторанда уй ҳайвонлари билан бирга уларнинг эгалари учун ҳам таом топилади. Ит эгалари учун алоҳида ошхонада карбонара, калмар қўшилган феттуччине, нёкки каби италян таомлари тайёрланади.