“Ўзэнергоинспекция” томонидан 2023 йилнинг шу даврига қадар ўтказилган назорат тадбирларида электр тармоқ хўжалиги объектларининг муҳофаза зоналарида ноқонуний қурилган 9 минг 57 та объект аниқланди, деб хабар беради Энергетика вазирлиги матбуот хизмати.
Таъкидланишича, ушбу муҳофаза майдонлари ҳудудида қурилган объектлар энг аввало инсонлар учун хавфли бўлиб, бундай қурилишлар тегишли махсус рухсатномалар орқали амалга оширилади.
Хусусан, “Ҳудудий электр тармоқлари” АЖ тасарруфидаги электр узатиш тармоқлари ҳудудида 8 минг 357 та, “Ўзбекистон миллий электр тармоқлари” АЖ тасарруфидаги электр узатиш тармоқлари ҳудудида эса 700 та объект аниқланиб, белгиланган талаблар бўйича далолатномалар расмийлаштирилган.
Шунингдек, аниқланган 7 минг 636 та объект бўйича маҳаллий ҳокимликлар ва судларга ҳужжатлар тақдим этилган бўлиб, ушбу ноқонуний қурилишларни хавфсиз ҳудудларга кўчириш юзасидан иш олиб борилмоқда. Айни вақтгача 91 та объект хавфсиз ҳудудларга кўчирилган.
Маълумот учун, муҳофаза зонаси – электр узатиш тармоғи бўйлаб четки симларидан ҳар иккала томонга вертикал текислик билан чегараланган ер майдони ва ҳаво бўшлиғидан иборат майдон. Мазкур ҳудудда уй, бино, иссиқхона ва ҳоказолар қуриш, ҳар қандай қурилиш ишларини олиб бориш қатъиян тақиқланади.
Аввалроқ Ўзбекистонда йил бошидан буён ҳуқуқ-тартибот органлари томонидан ўтказилган назорат тадбирларида 26 та ноқонуний майнинг ферма фош қилингани тўғрисида хабар берилганди.
Изоҳ (0)