Колорадо Олий суди Дональд Трамп штатда АҚШ президентлигига номзодини қўйиш ҳуқуқига эга эмаслиги ҳақида қарор чиқарди. Қарор шуни англатадики, март ойида бўлиб ўтадиган республикачилар праймеризида ва ноябрда бўлиб ўтадиган умумий сайловларда Трампнинг исми Колорадода сайлов бюллетенига киритилмайди. Ҳукм Конституциядаги ўн тўртинчи тузатишга асосланади: у Капитолийга ҳужум қилганларнинг сайловда иштирок этишини тақиқлайди.
Етти судьядан тўрт нафари қарор учун овоз берди. Ҳукм 2024 йил 4 январдан кучга киради, аммо бошқа штатлар учун мажбурий бўлмайди. Судьялар Трампнинг адвокатлари АҚШ Олий судига шикоят қилиши мумкинлигини таъкидлади. Бу ҳолатда қарор Олий судда ҳукм чиқарилгунга қадар Колорадода кучга кирмайди, бироқ Трамп томони мағлуб бўлса, унинг номзоди барча штатларда тақиқланади.
Ҳар бир штат АҚШда президентлик сайловларини мустақил равишда ўтказади. Овоз беришни ташкил этиш қоидалари ва номзодларнинг сайлов бюллетенига кириш мезонлари штатлар томонидан мустақил равишда белгиланади.
Трампга қарши худди шундай даъволар Миннесота ва Мичиган штатларида ҳам қўзғатилган, аммо иккала штатдаги судлар собиқ президент номзодини қайта сайловга қўйишни тақиқлашни рад этган.
2020 йилда Жо Байден Колорадода 55 фоиз овоз олганди. 2004 йилдан бери Колорадода Республикачилар партиясидан президентликка номзодларнинг бирортаси ҳам ғалаба қозона олмаган.
Изоҳ (0)