Қозоғистонда полиция қозоғистонлик рэпер Jah Khalib (Бахтияр Мамедов)нинг Ўзбекистондаги концерти олдидан содир бўлган тартибсизликлар ортидан Олмаота аҳолисига мурожаат қилди. Бу ҳақда Tengrinews хабар берди.
25 ноябрь куни Тошкентда Jah Khalib концерти олдидан тиқилинч ва тартибсизликлар юз берди. Бунга қалбаки чипталар сабаб бўлгани, улар қўлда сотилгани таъкидланди.
“Масалан, атиги битта QR код ёрдамида тадбирга киришга 115 марта уриниш қилинган”, — дейди чипталар сотган компания.
Маданий-кўнгилочар тадбирларга чипталар сотиш билан боғлиқ ноқонуний манипуляциялар фактларининг олдини олиш мақсадида Олмаота полицияси шаҳар аҳолиси ва меҳмонларига мурожаат қилди:
“Фирибгарлар қурбонига айланмаслик учун концертлар учун чипталарни расмий манбалардан сотиб олиш керак”, — деди ҳуқуқ-тартибот идоралари ходимлари.
Эслатиб ўтамиз, Тошкентда Jah Khalib концертига сохта чипталар сотилгани юзасидан жиноят иши қўзғатилган. Миллий гвардия Тошкент шаҳри бўйича бошқармаси берган маълумотга кўра, концерт дастури учун чиқарилган 10 мингдан ортиқ электрон чипталар сотиб олинган.
Humo Arena саройига кириш учун ташриф буюрган фуқароларнинг чипталари iTicket ходимлари томонидан махсус сканер қурилмасининг QR-коди орқали текширилиб киритилган. Ўриндиқлар тўлган бўлса-да, ташқарида концертга кириш истагида бўлган мингдан ортиқ фуқаро қолиб кетган.
Ушбу фуқароларнинг электрон чипталари кириш жойида такроран тақдим этилаётгани ҳам аниқланган ва бундай чипта эгалари назорат ўтиш жойидан ичкарига қўйилмаган. Улар чипталарни танишлари ёки бошқа жисмоний шахслардан совға сифатида ҳамда пул эвазига қўлга киритгани маълум бўлган. Айрим фуқаролар электрон чипталарни ўз манфаати йўлида такроран сотгани аниқланган.
Айни пайтда тергов ҳаракатлари давом этмоқда.
Изоҳ (0)