Қорақалпоғистон Республикаси ва Андижон вилоятида кўмир етказиб беришдаги талон-торожликлар фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Тахиатош туман бўлими томонидан терговга қадар текширув ўтказилган. Текширувда “У.Э.” МЧЖ масъул шахслари давлат-хусусий шерикчилик битимга асосан тумандаги 49 та ижтимоий соҳа объектларини иситиш мавсумида кўмир билан узлуксиз таъминлаш учун ажратилган маблағларнинг 452,3 миллион сўмини бошқа мақсадларга сарфлаб, ўзлаштириш йўли билан талон-торож қилгани аниқланган.
Департаментнинг Балиқчи туман бўлими томонидан ўтказилган терговга қадар текширувда “Кўмир таъминот” МЧЖнинг Шаҳрихон кўмир омбори масъул шахслари аҳолига имтиёзли нархда 612,3 тонна кўмир сотилгани тўғрисида сохта ҳужжатларни расмийлаштириб, ушбу кўмирни бозор нархида бошқа шахсларга сотиб юборгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бухоро шаҳри “Абу Али ибн Сино” МФЙ ҳоким ёрдамчиси кредит маблағларини ўзлаштирганликда айбланиб, жиноят иши қўзғатилгани, Янгийўл тумани ҳокими маҳаллалардаги 6 нафар ёрдамчисини жазолагани тўғрисида хабар берилганди.
Изоҳ (0)