Комик актриса Ҳалима Ибрагимова “Ўзимизнинг гап” кўрсатувига берган интервьюсида прокурор бўлиш орзусидан ҳалиям воз кечмагани, турмуш ўртоғи билан қандай танишгани ҳамда Юлдуз Усмонованинг ёнида юриши ҳақида сўзлаб берди.
Ҳалима Ибрагимова юридик институтга ўқишга кирмоқчи эканлиги ҳақида гапирди.
— Мен прокурор бўламан, дердим, ҳалиям шу ниятимдан қайтганим йўқ. Ўтган йили топшираман дегандим, улгурмай қолдим, чунки ишларим кўпайиб кетди. Кейинги йил юридик университетга топшириб, прокурорликка ўқимоқчиман. Шу пайтгача учта университетни: санъат ва маданият, молия ҳамда Қозоғистонда психология йўналишини битирганман. Отам вафот этганидан сўнг ҳамма орзуларим синган. Онам отамдан кейин анча сиқилиб қолганди. 1996 йилда ишга кириб кетганман. 27 йилдан бери ишлайман. Ота-онамдан кейин ҳеч нарса қолмаган уйимда. Ҳамма нарсага ўз меҳнатим билан эришганман. Бобом Фарҳод бозорининг хўжайини бўлган, ўша ерга бухгалтер бўлиб ишга кирганман.
Актриса, шунингдек актрисалик фаолиятидан пул топмаслиги ҳақида ҳам сўзлаб берди.
— Мен шу пайтгача топган нарсаларимнинг ҳаммасига бозорда ишлаб эришганман. Актрисалик фаолиятимдан бир тийин ҳам топмаганман. Уйимда шунча нарса бор, лекин актрисаликдан олган пулимга битта сервиз ҳам ололмаганман. Охирги 7-8 йил ичида Instagram ривожланганидан кейин биринчилардан бўлиб, реклама олишни мен бошлаганман. Санъаткорлар бошида реклама қилишни ўзига эп кўрмасди. Мен пишириқчими, ресторанми, кафеми ҳамма нарсани реклама қила бошлаганман. 23 йилдан 18 йилини ном чиқариш, танилиш учун қилганман. Бозордан ишлаган пулимни бизнесга тикиб қўйганман. Керак бўлса бизнесдан тушган пулимни санъатимга тиккан жойларим ҳам бўлган.
Ҳалима Ибрагимова оиласида ким кўпроқ пул топиши ҳақидаги саволга ҳам жавоб берди.
— Оилада мен кўпроқ пул топаман. Лекин хўжайиним ҳам ўзига яраша пул топади. Рўзғор харажатларига умуман аралашмайман. Болаларнинг ўқиши ҳам эримнинг бўйнида. Хўжайинимнинг ҳам бизнеслари бор, мен топаётган пулим билан иши йўқ, ўзини ишини орқасидан ўзи пул топиб юради. Турмуш ўртоғим ўзимдан 7 ёш кичик бўлгани учун тўйим роса шов-шувларга сабаб бўлган. Бошида турмуш қуриш таклифини берганида кўнмаганман. У опамнинг қўшниси бўлган. Нияти жиддий бўлгани учун қайнонамни совчиликка жўнатганидан сўнг рози бўлганман. Тўйимиз 10 кун ичида бўлиб кетган. Эрим ҳозир сал эътироз билдириб видео олсам, “Тўполон қилма”, деб туради. Бир куни автосалонда жанжал кўтарсам, ходимлар “Ока, хотинингизни олинг”, дейишди. Хўжайиним эса бамайлихотир “Энди олиб бўлмайди”, деб жавоб берган.
Ҳалима Ибрагимова сўнгги йилларда кўпинча Ўзбекистон халқ артисти Юлдуз Усмонова билан бирга юради. Актриса бунинг сабабига ҳам тўхталиб ўтди.
— Кўпчилик Юлдуз Усмонованинг олдида юришимнинг сабабига қизиқади. Юлдуз Усмонова ҳаммага ҳам дардини айтаверадиган инсон эмас. Яна айримлар Озоданинг олдида юриб, энди Юлдуз билан юрибди, дейишади. Лекин Озода опа билан юрганимдан кейин неча йиллар ўтиб, Юлдуз Усмонова билан танишганман. Озода опанинг уйида юриб, қанча сирларидан бохабар бўлганман, лекин Аллоҳ гувоҳ биронтасини ташқарига чиқармаганман. Чунки ота-онам туз-нон еган жойимга хиёнат қилмасликни ўргатган.
Изоҳ (0)