Самарқандда Gentra ҳайдовчиси мактаб ўқувчини уриб юбориб, қочиб кетгани тўғрисида хабар берилганди. Самарқанд вилояти ИИБнинг маълум қилишича, транспорт воситасини 15 ёшли йигит бошқариб кетаётган бўлган.
Кўнгилсиз ҳодиса 18 декабрь куни соат 17:25 ларда Самарқанд тумани “Равонак” МФЙ ҳудудидан ўтувчи ички йўлда содир бўлган. Йўлни кесиб ўтаётган 7-синф ўқувчисини Gentra уриб юборган ва ҳайдовчи воқеа жойидан кетиб қолган.
Оқибатда мактаб ўқувчиси тан жароҳати олиб, туман тиббиёт бирлашмасига ётқизилган. ЙПХ ходимлари томонидан олиб борилган суриштирув давомида ҳайдовчи ва транспорт воситаси топилган.
“Уддабурон ўқувчи ЙТҲ содир этгандан сўнг устахонага бориб, машинасининг шикастланган жойларини таъмирлатишга ҳам улгурган”, — дейилади хабарда.
Маълум бўлишича, Gentra бошқарувида 15 ёшли ўсмир бўлган. У онасига тегишли машинани сўрамасдан миниб чиққан. Ҳозирда ҳолат юзасидан Самарқанд тумани ИИБ томонидан дастлабки суриштирув ишлари олиб борилмоқда.
Ўзбекистонда 2023 йилнинг январь—август ойлари давомида 1415 нафар фуқаро йўл-транспорт ҳодисаси оқибатида вафот этди. Ўтган саккиз ойда мамлакатда 9 миллиондан ортиқ йўл ҳаракати қоидабузарлиги қайд этилган. Буларнинг 8 миллионга яқини қўпол қоидабузарликлар, 26 мингга яқини транспорт воситасини маст ҳолда бошқариш, 161 мингдан ортиқ пиёдалар қоидабузарлиги билан боғлиқ.
Изоҳ (0)