Мактабгача ва мактаб таълими вазирлиги тизимидаги мактабларда фаолият юритаётган тоифага эга ўқитувчилар сони 282 424 нафарни ташкил этади. Бу ҳақда АОКАда ўтказилган матбуот анжуманида вазирлик департаменти директори Сардор Ражабов маълум қилди, дея хабар берди “Дарё” мухбири.
Сардор Ражабовнинг айтишича, ҳозирда республикадаги 10 104 та мактабда 525 737 нафар ўқитувчи дарс бермоқда.
“Олий тоифали ўқитувчилар сони 53 914 нафарни, биринчи тоифалилари 101 751 нафарни, иккинчи тоифалилари 126 759 нафарни ташкил қилади. Мутахассислар сони эса 177 122 нафар”—деди вазирлик масъули.
Абдулла Авлоний номидаги миллий–тадқиқот институти ректори Абдували Исмоилов йилига неча нафар ўқитувчи малака оширишини айтди.
“Ҳар йили 500 минг нафарга яқин мактаб ўқитувчиси малака оширади. Шундан 40 фоизи мустақил таълим тарзида, 60 фоиздан ортиғи анъанавий тарзда малака оширмоқда. Ўқитувчилар 7 ҳафталик (36 соат) малака ошириш курсига мажбурий жалб қилинади”—деди институт раҳбари.
Маълумот учун, айни пайтда вазирлик тизимидаги мактабларда қарийб 6,3 миллион нафар ўқувчи таҳсил олмоқда.
Изоҳ (0)