Samarqandda Gentra haydovchisi maktab o‘quvchini urib yuborib, qochib ketgani to‘g‘risida xabar berilgandi. Samarqand viloyati IIBning ma’lum qilishicha, transport vositasini 15 yoshli yigit boshqarib ketayotgan bo‘lgan.
Ko‘ngilsiz hodisa 18-dekabr kuni soat 17:25 larda Samarqand tumani “Ravonak” MFY hududidan o‘tuvchi ichki yo‘lda sodir bo‘lgan. Yo‘lni kesib o‘tayotgan 7-sinf o‘quvchisini Gentra urib yuborgan va haydovchi voqea joyidan ketib qolgan.
Oqibatda maktab o‘quvchisi tan jarohati olib, tuman tibbiyot birlashmasiga yotqizilgan. YPX xodimlari tomonidan olib borilgan surishtiruv davomida haydovchi va transport vositasi topilgan.
“Uddaburon o‘quvchi YTH sodir etgandan so‘ng ustaxonaga borib, mashinasining shikastlangan joylarini ta’mirlatishga ham ulgurgan”, — deyiladi xabarda.
Ma’lum bo‘lishicha, Gentra boshqaruvida 15 yoshli o‘smir bo‘lgan. U onasiga tegishli mashinani so‘ramasdan minib chiqqan. Hozirda holat yuzasidan Samarqand tumani IIB tomonidan dastlabki surishtiruv ishlari olib borilmoqda.
O‘zbekistonda 2023-yilning yanvar—avgust oylari davomida 1415 nafar fuqaro yo‘l-transport hodisasi oqibatida vafot etdi. O‘tgan sakkiz oyda mamlakatda 9 milliondan ortiq yo‘l harakati qoidabuzarligi qayd etilgan. Bularning 8 millionga yaqini qo‘pol qoidabuzarliklar, 26 mingga yaqini transport vositasini mast holda boshqarish, 161 mingdan ortiq piyodalar qoidabuzarligi bilan bog‘liq.
Izoh (0)