Украиналик расмий Зеленский ва Залужний ўртасидаги “даҳшатли” келишмовчилик ҳақида маълум қилди

Украина президенти Владимир Зеленский ва Украина Қуролли кучлари бош қўмондони Валерий Залужний ўртасидаги муносабатларни “даҳшатли” сўзидан бошқача таърифлаб бўлмайди, деб ёзди Тhе Economist манбаларга таяниб.

Украина ҳукуматидаги юқори мартабали манбанинг газетага айтишича, мамлакат раҳбарияти ичидаги очиқ можаро “режага мувофиқ кетмаган” қарши ҳужум натижасидир. Расмийнинг фикрига кўра, Залужний президентнинг оптимистик позициясига зид бўлган баёнотлар бериб, “ақлсизлик қилган” аммо ҳукуматда унинг хулосалари билан баҳслаша оладиганлар кам.

Ҳозирда томонлар муваффақиятсизлик учун жавобгарликни ўз зиммасига олишга уринмоқда, дейди Тhе Economist манбаси.

“Сиёсатчилар генералларини советча тайёргарликдан ўтган эси пастлар дейди. Генераллар эса сиёсатчиларни уларнинг ишига аралашадиган аҳмоқлар дейди”, — таъкидлади манба.

Зеленский ва Залужний ўртасидаги можарода рол ўйнаши мумкин бўлган яна бир омил — Россиянинг кенг кўламли босқини бошида Украина жанубида мудофаа муваффақиятсизликка учрагани бўйича очилган жиноий иш, деб ҳисобламоқда Тhе Economist. Баъзи маълумотларга кўра, Украина Қуролли кучлари бош қўмондони ҳали ҳам унда гувоҳ сифатида иштирок этмоқда. Залужнийнинг матбуот билан фаол мулоқоти у жиноий жавобгарликка тортилган тақдирда суғурта сифатида кўрилиши мумкин, деди Украина Қуролли кучлари Бош штабидаги манба.

Залужний сиёсий амбициялари ҳақида эълон қилмаган, унинг сиёсий майдондаги бир неча қадамлари ҳам “унчалик оқилона эмас”, деб таъкидлайди Тhе Economist. Бироқ, нашрнинг фикрича, бу унинг Зеленскийга таҳдид солмаслигини англатмайди.

Тhе Economist нашри Украинада ноябрь ойида ўтказилган ва нашр қўлига тушган ёпиқ ижтимоий сўров натижаларини келтириб ўтди. Унга кўра, Зеленскийга бўлган ишонч рейтинги пасаймоқда (32 фоиз), Залужнийга бўлган ишонч рейтинги юқорилигича қолмоқда (70 фоиз).

Нашрнинг қайд этишича, Россия Украинадаги сиёсий бўлинишдан фойдаланиши мумкин. Economist’нинг Украина разведкасидаги манбалари таъкидлашича, Россия аллақачон кескинликдан фойда кўришга уринмоқда.

Владимир Зеленский ва Валерий Залужний ўртасидаги очиқ можаро Украина Қуролли кучлари бош қўмондони билан интервьюдан сўнг фаол муҳокама қилина бошлади — суҳбатда Залужний фронтдаги вазият боши берк кўчага кириб қолганини айтганди. Украина президенти очиқчасига бош қўмондоннинг баҳоларига қўшилмаган ва кейинроқ ҳарбийлар сиёсат билан шуғулланмаслиги кераклигини айтган. Украина президенти офиси мамлакатнинг ҳарбий ва сиёсий раҳбарияти ўртасидаги бўлинишни рад этиб келади.