АҚШ президенти Жо Байден кортежидаги машинага номаълум шахс бошқарувидаги машина келиб урилди, давлат раҳбари ва биринчи хоним Жилл Байден жабрланмаган, деб хабар бермоқда Reuters гувоҳларга таяниб.
AP агентлигига кўра, Байден Делавердаги сайловолди тадбиридан чиқиб кетаётганида кумушранг седан кортеждаги зирҳли Махфий хизмат машинасига келиб урилган. Шундан сўнг седан ёпиқ чорраҳага қочишга уринган, бироқ Махфий хизмат ходимлари тезда уни ўраб олган ва ҳайдовчига қарата қурол ўқталиб, уни ҳибсга олган.
Байденни рафиқаси ўтирган машинага олиб боришган, сўнг уларни яшаш жойига кузатиб қўйишган. AP таъкидлаганидек, воқеа давлат раҳбарининг иш жадвалига таъсир қилмаган.
Маълумот учун, АҚШ президенти кортежи ҳар сафар 100 дан ортиқ одамни ташийдиган 50 га яқин турли транспорт воситаларидан иборат. Кортеж марказида Cadillac 1 ёки The Beast номи билан машҳур президент лимузини юради. Норасмий маълумотларга кўра, The Beast оғир пикапнинг кучайтирлган шассисига асосланган ва лимузиннинг оғирлиги 9 тоннага етиши мумкин.
The Beast кортеждаги ягона шундай машина эмас. Унинг атрофида бир хил давлат рақамига эга лимузин-клон юради, шунинг учун суиқасд уюштиришни режалаштираётганлар президент қайси машинада кетаётганини аниқлай олмайди. Лимузинлар Chevrolet Suburban базасидаги бешта оғир зирҳли йўлтанламаслар билан ўралган бўлиб, уларда турли махсус қурилмаларга эга Америка разведка идоралари вакиллари юради.
Изоҳ (0)