Боғчаларда калтакланаётган болалар, мактабларда дўпосланаётган ўқувчилар — эндиликда бундай ҳолатларга йўл қўйган мутасаддилар иши Болалар омбудсмани томонидан ўрганилади

Афсуски, мактаб, боғча ва бошқа муассасаларда болаларни калтаклаш, уларга нисбатан таъзиқ ҳамда зўравонлик ҳолатлари учраб турибди.

Эндиликда Болалар омбудсманига мансабдор шахсларга бола ҳуқуқларига риоя этилиши бузилиши ва уларга имкон берувчи шарт-шароитларни бартараф этиш тўғрисида тақдимнома киритиш ҳуқуқи белгиланмоқда. Бундай ҳуқуқ Болалар омбудсмани фаолияти таъсирчанлигини оширади. Хусусан, бу бола манфаатларини бузилишига йўл қўйган ҳар қандай мансабдорга тегишли чора кўрилишига эришиш имконини яратади.

Олий Мажлис Қонунчилик палатасининг навбатдаги мажлисида  “Ўзбекистон Республикаси Олий Мажлисининг Бола ҳуқуқлари бўйича вакили (Болалар омбудсмани) тўғрисида”ги қонун қабул қилинди.

Ушбу қонун билан Бола ҳуқуқлари бўйича вакилнинг мақоми, унинг ҳуқуқлари, мажбуриятлари, вазифалари ва ваколатлари ҳамда Бола ҳуқуқлари бўйича вакилнинг давлат органлари, шу жумладан, ҳуқуқни муҳофаза қилувчи органлар, фуқаролик жамияти институтлари билан ўзаро муносабатлари белгиланмоқда.