Тоза сув, озиқ-овқат ва бошпана йўқлиги Ғазо сектори аҳолиси орасида юқумли касалликларнинг тарқалиш хавфини келтириб чиқарди. Бу ҳақда шифокор ва мутахассисларга таяниб, Reuters хабар берди.
“Ғазо секторида касаллик тарқалиши учун идеал муҳит яратилди. Энди гап унинг оқибатлари қанчалик жиддий бўлиши ҳақида бормоқда”, — деди агентликка БМТ Болалар жамғармаси вакили Жеймс Элдер.
Жаҳон соғлиқни сақлаш ташкилоти маълумотларига кўра, 29 ноябрдан 10 декабрга қадар ошқозон-ичак касалликлари белгиларини бошдан кечирган беш ёшгача бўлган болалар сони 66 фоизга ошиб, 59 895 нафарга етди, деб ёзади Reuters. Анклавнинг қолган аҳолиси учун бу кўрсаткич 55 фоизни ташкил этди.
Ғазо сектори жанубидаги Хон Юнис шаҳридаги касалхона педиатрия бўлими мудири Аҳмад ал-Фарра агентликка унинг бўлими сувсизланишдан азият чекаётган болалар билан тўлиб кетганини айтди. Бу баъзи болаларда буйрак етишмовчилигига олиб келди ва диарея ҳолатлари тўрт баравар кўпайди.
Ал-Фарранинг сўзларига кўра, сўнгги икки ҳафта ичида шаҳарда гепатит А билан касалланиш бўйича 15-30 та ҳолат қайд этилган.
“Вируснинг инкубация даври уч ҳафтадан бир ойгача давом этади, шунинг учун бир ойдан сўнг гепатит А билан касалланганлар сони кескин кўпаяди”, — деди у.
Изоҳ (0)