Хоразм вилоятидаги боғчалардан бирида болаларни уриб дарс ўтган тарбиячилар ишдан бўшатилгани тўғрисида хабар берилганди. Болалар омбудсмани Сурайё Раҳмонова мазкур ҳолатга ўз муносабатини билдирди.
Қайд этилишича, мазкур ҳолат Болалар омбудсмани томонидан назоратга олинган. Ҳозирда ушбу факт бўйича Урганч тумани ИИБ ходимлари томонидан терговга қадар текширув ҳаракатлари олиб борилмоқда.
Сўнгги пайтларда турли таълим муассасаларда таълим-тарбияга масъул шахсларнинг нолойиқ, қўпол муомаласи ёки озор бериши оқибатида болаларга турли даражадаги жароҳат ёки эмоционал-психологик таъсир кўрсатиш ҳолатлари учрамоқда.
Болалар омбудсмани бундай ҳолатларга мутлақо муросасиз муносабатда бўлиб, бола манфаатларини бузилишига йўл қўяётганларни нафақат лавозимидан ёки вазифасидан озод этиш, балки уларга қонун доирасидаги тегишли жавобгарлик чоралари кўрилиши зарур, деб ҳисоблайди.
“Зеъро, болаларга нисбатан содир этилган ҳар қандай зўравонлик ҳолатининг жавобсиз қолиши бундай номаъқул амалиётни давом этишига олиб келади. Шунингдек, педагог ва тарбиячилар тегишли вазифа ёки лавозимга тайинланишидан аввал махсус психологик кўрикдан ўтказилиши муҳим. Хусусан, уларнинг бола билан яқиндан мулоқот қилишга психологик ва эмоционал жиҳатдан тайёрлиги даражаси ва ментал соғлиғи барқарорлиги тизимли равишда текширувдан ўтказилиши мақсадга мувофиқ”, — дейди Болалар омбудсмани.
Аввалроқ Самарқанд вилоят ИИБ бошлиғи Раҳмат Маматов Россиядаги эри билан жанжаллашиб қолиб, икки нафар қиз фарзандини калтаклаб видеога олган она воқеасига муносабат билдирган эди.
Изоҳ (0)