Статистика агентлиги берган маълумотларга кўра, январь-октябрь ойларида газ қазиб олиш ҳажми ўтган йилнинг мос давридагига нисбатан 4,1 миллиард кубометрга камайди.
Жорий йилнинг 10 ойи ичида республикада 38,9 миллиард кубометр табиий газ қазиб олинган. Таққослаш учун, 2022 йилнинг мос даврида бу кўрсаткич 43 миллиард кубометрни ташкил этган.
Аввалроқ агентлик тақдим қилган статистик рақамларда 2022 йил якунида Ўзбекистонда 51,6 миллиард куб метр, 2021 йилда 53,8 миллиард куб метр табиий газ қазиб олингани акс этганди. Яъни 2021 ва 2022 йиллар оралиғида газ қазиб олиш ҳажми 2,2 миллиард куб метрга камайганди.
Шу йилнинг август ойида “Дарё” мухбири билан суҳбатда “Ўзбекнефтгаз” раисининг ўринбосари Беҳзод Усмонов Ўзбекистонда табиий газ қазиб чиқариш ҳажми камаймаганини айтганди.
“Ҳали кўп газимиз бор. Газ қазиб олиш ҳажми камайгани йўқ. Ҳозир ишлаб чиқарилган газ етишмаслиги аҳоли сонининг ошаётгани билан боғлиқ. Одамлар ҳам кўпаймоқда, ишлаб чиқариш қувватлари ҳам ошмоқда. Яъни энергетикага талаб жуда юқори. Тўғри, асосий ва энг йирик конларимизда ишлаб чиқариш пасаймоқда. Бунинг олдини олиш учун қўшимча чора-тадбирлар кўриляпти. Хусусан, янги конлар, қудуқларни бурғилаш ишлари олиб бориляпти. Бу йил ҳам бир нечта янги конлар очилиши режалаштирилган”, — деган раис ўринбосари.
Бугунги кунда Ўзбекистонда 287 та газ конлари мавжуд бўлиб, улардан 123 таси “Ўзбекнефтгаз” тасарруфида. Мамлакатдаги умумий газ захираларининг ҳажми 1,8 триллион куб метр. Шундан 50 фоизи — 900 миллиард куб метри “Ўзбекнефтгаз” конларидаги газ захиралари ҳисобланади.
Жорий йил 16 июнда тузилган шартномага мувофиқ, Россия Ўзбекистонга газ экспорт қилишни бошлаган. Ҳужжатга асосан, кунига 9 миллион кубометр табиий газни импорт қилиниши белгиланган, йиллик импорт ҳажми эса 2,8 миллиард кубометрга етиш кўзда тутилган.
Аввалроқ “Дарё” мухбири сўровига жавобан, Энергетика вазирлиги “Россиядан сотиб олинаётган газ қиш фаслида Ўзбекистон эҳтиёжининг етишмаётган қисмини қоплайди”, — дея жавоб қайтарганди. Бироқ Россия гази неча пулдан сотиб олинаётгани ҳалигача очиқланмаган. Энергетика вазири Жўрабек Мирзамаҳмудов Ўзбекистон Россияга газ учун қанча тўлашини айта олмаслиги, лекин нархни белгилашда миллий манфаатлардан келиб чиқилганини маълум қилган.
Изоҳ (0)