“Заправкаларга газ етказишни 30 фоиз қисқартирамиз” — вазир аномал совуқ келса, газ қандай тақсимланишини айтди

Келаётган қишда аномал совуқ кузатилса, мамлакатдаги заправкаларга ва GTL заводига газ етказиб бериш ҳажми қисқартирилади. Бу ҳақда энергетика вазири Жўрабек Мирзамаҳмудов Олий Мажлис Қонунчилик палатаси йиғилишида маълумот берди.

Вазирнинг айтишича, 2022 йилдаги аномал совуқ даврида мамлакатда кунлик 21,6 миллион кубометр газ тақчил бўлган.

“Ҳозирда шунча миқдорнинг ўрнини қоплаш манбалари бўйича аниқ ҳисоб-китоблар қилинди. Энг аввало, қишга тайёргарлик доирасида ерости омборларида 3,5 миллиард кубометр табиий газ захираси яратилди. Ерости газ сақлаш омборларидан ўтган йили кунлик 18–20 миллион кубометр табиий газ олинган бўлса, бу йил кунига 35–40 миллион кубометргача олиш имкони бўлади. Аномал совуқ кунлари GTL заводига 5 миллион кубометр газ беришни қисқартирамиз. Шу билан бирга, заправкаларга ҳам газ беришни 30 фоизга қисқартириш ҳисобидан газ дефицити қопланади. Ҳозирда заправкаларга кунига 15 миллион кубометр газ етказиб берилмоқда”, — деди вазирлик раҳбари.

Жўрабек Мирзамаҳмудовнинг қўшимча қилишича, куз-қиш даврида республикада табиий газга бўлган умумий талаб 28 миллиард кубометрни ташкил этиши (2022 йилгидан 2,5 миллиард кубометр кўп) кутилмоқда. Жорий мавсумда “Ўзбекнефтгаз” АЖ томонидан 16,2 миллиард кубометр, хорижий ва қўшма корхоналар томонидан 10 миллиард кубометр табиий газ қазиб чиқариш таъминланади.

“Эришилган келишувларга асосан, қўшни давлатдан ҳамда шимолдан қўшимча газ импорт қилиб, ички бозорга йўналтиришни таъминлаяпмиз”, — дея таъкидлаган вазир.