Тошкент шаҳар мактабгача ва мактаб таълими бошқармаси пойтахтдаги мактабларнинг бирида “дымавушка” тутатилгани юзасидан маълумот берди.
Ижтимоий тармоқларда Юнусобод туманидаги мактаблардан бирининг ўқувчилари кучли тутун чиқарувчи моддани тутатгани тасвирланган видео тарқалди. Мазкур ҳолат Тошкент шаҳар мактабгача ва мактаб таълими бошқармаси Ишчи гуруҳи томонидан ўрганилган.
Унга кўра, 14 декабрь куни соат 10:15 ларда Юнусобод туманидаги 97-сонли умумтаълим мактабининг ошхонасида 11-“А” синф ўқувчиси И.Ж. танаффус вақтида ёнида бўлган “Дымавушка” номли қўлбола ясалган кучли тутун чиқарувчи моддани тутатган. Бу ҳодисани шу мактабнинг 9-“V” синф ўқувчиси А.А. эса ўзининг уяли телефони орқали видеотасвирга олган ва Instagram ижтимоий тармоғидаги саҳифасига жойлаштирган ҳамда тарқатган.
“Ҳозирда мазкур ҳолат юзасидан терговга қадар суриштирув ишлари олиб борилаётганлигини маълум қиламиз”, — дейилади хабарда.
Февраль ойида Самарқанд вилоятининг Ургут туманида мактаб директори пақилдоқ ташлаган 12 ёшли ўқувчини уриб, унинг қулоқ пардасини йиртиб юборгани тўғрисида хабар берилганди.
Изоҳ (0)