Украина президенти Владимир Зеленский Брюсселдаги саммитда иштирок этаётган 27 та Европа Иттифоқи етакчиларига видеоалоқа орқали мурожаат қилди. Саммитда Украинанинг Европа Иттифоқига қўшилиши бўйича музокараларни бошлаш тўғрисида қарор қабул қилиниши мумкин.
Мурожаат чоғида Зеленский, хусусан, “бугунги кунда қатъиятсизликка тушмаслик” ва “Европадаги ишончга хиёнат қилмаслик”ка чақирди.
“Бу кун бизнинг тарихимизга киради. Биз учун яхши ёки ёмон бўладими — тарих ҳамма нарсани ёзиб олади. Ҳар бир сўз, ҳар бир қадам, ҳар бир ҳаракат ва ҳаракатсизлик тарихда қолади. Ким нима учун курашгани аён бўлади. Бугун Европа қарор қабул қилиши жуда муҳим. Ҳеч ким Европа ишончсиз деб ҳисобланишини ёки ўзи тайёрлаган қарорларни қабул қилишга қодир эмас деб ҳисобланишини хоҳламайди”, — деди у.
Украина президентининг таъкидлашича, Киев Европа Иттифоқига аъзолик бўйича музокараларни бошлаш бўйича талабларнинг барчасини бажарган.
“Биз ваъда қилинган қарор ҳақида гапиряпмиз. Мен бутун Европа келишиб олган режани амалга оширишга тўсиқ бўлиши мумкин бўлган ҳеч қандай қарши далилларни эшитмадим”, — деди президент.
Зеленский ўтган йили Украина аниқ тавсиялар олганини таъкидлаб, барча зарур асосий қонунлар қабул қилинганини эслатди.
Изоҳ (0)