Агар боғчада 35 нафар болага битта тарбиячи қараб ўтирган бўлса, у ерда ҳеч қандай педтехнология амалга ошаётгани йўқ. Бу ҳақда Олий Мажлис Қонунчилик палатасининг “2024 йил учун Ўзбекистон Республикасининг Давлат бюджети тўғрисида”ги қонун лойиҳасининг муҳокамасига бағишланган мажлисида депутат Алишер Қодиров айтиб ўтди.
Алишер Қодировнинг маълум қилишича, боғчаларда аҳвол чатоқ – 30-35 нафар болага битта тарбиячи тўғри келмоқда.
“Бутун тизимдаги олий маълумотга эга бўлган тарбиячилар бор-йўғи 25-30 фоизни ташкил қилмоқда. Биз қамровни кенгайтириш ҳақида гапиряпмиз, лекин нима учун сифат ҳақида гапирмаяпмиз? Боғчаларда йўқотган масаламизни мактабда тузатишга ҳаракат қиляпмиз. Лекин бу ҳам ўз самарасини бермайди.
Агар боғчада 35 нафар болага битта тарбиячи қараб ўтирган бўлса, у ерда ҳеч қандай педтехнология амалга ошаётгани йўқ. У ерда болалар сақлаб турилибди. Айнан шу сабабли боғча тарбиячиларининг ҳам ойлиги ҳақида, 35 нафар болага битта тарбиячи эмас, 10-15 нафар болага жаҳон стандартларига уйғун шаклда битта тарбиячи қарайдиган шароитларни ўйлашимиз керак”, – деди “Миллий тикланиш” демократик партияси фракцияси раҳбари.
Депутат вазирликдан ушбу масала бўйича жиддий қарорлар қабул қилишни сўради.
Аввалроқ Алишер Қодиров ўқитувчиларга сарфланаётган маблағлар ўз натижасини бермаётганини айтиб ўтган эди.
Изоҳ (0)