Жо Байден ҲАМАС билан уруш бўйича АҚШ ва Исроил расмийлар ўртасидаги келишмовчиликларни омма олдида тан олди. АҚШ президентининг сўзларига кўра, Исроил Ғазо секторини бомбардимон қилишда давом этиб, халқаро ҳамжамиятнинг қўллаб-қувватловини йўқотмоқда, шу сабабдан Биньямин Нетаньяху бошчилигидаги ҳукумат ҲАМАС билан урушга муносабатини ўзгартириши керак, деб ёзди CNN.
Байден 2024 йилги сайлов компанияси учун донорлар билан учрашувда айтишича, ҳозир Исроил бутун дунё бўйлаб мисли кўрилмаган қўллаб-қувватловга эга, аммо “номақбул бомбардимон туфайли уни йўқотишни бошлаган”.
У Нетаньяху ўз сиёсатини ўзгартириши керак, деб ҳисоблайди. Бироқ “Исроил тарихидаги энг консерватив” ҳукумат аъзоларининг позицияси туфайли бу осон бўлмайди, деб қўшимча қилди Байден.
Аввалроқ Исроил бош вазири ҳам Ғазо секторининг келажаги борасида ўзининг асосий иттифоқчиси бўлган АҚШ билан келишмовчиликларни биринчи марта очиқ тан олганди.
“Ҳа, бизда ҲАМАСдан кейинги кунлар борасида келишмовчиликлар бор ва умид қиламанки, уларни енгиб ўтамиз”, — дейилади Исроил бош вазири матбуот хизмати баёнотида.
Нетаньяху Ғазо сектори ва Ғарбий Соҳил назорати остидаги Фаластин миллий маъмуриятини яратишга рухсат берувчи Норвегия келишувларига ишора қилиб, Исроил “Осло хатосини” такрорлашига йўл қўймаслигини таъкидлади.
2007 йилдан бери Ғазо сектори амалда ҲАМАС назорати остида, Фаластиннинг қолган ҳудуди — Ғарбий Соҳил эса ҳамон Фатҳ етакчиси Маҳмуд Аббос бошчилигидаги Фаластин миллий маъмурияти томонидан бошқарилади. АҚШ ҲАМАС мағлубиятга учрагач, Ғазо сектори Фаластин миллий маъмурияти назоратига қайтишини ёқламоқда.
Исроил расмийлари бўлса бу режага рози эмас.
“Ғазо Ҳамастон ҳам, Фатҳистон ҳам бўлмайди”, — деди Нетаньяху.
Изоҳ (0)