Россиянинг Украина билан урушдаги йўқотишлари ўлдирилган ва ярадор қилинган 315 минг ҳарбий хизматчини ташкил этади, бу уруш бошида Россия Мудофаа вазирлиги таркибида бўлган ходимларнинг 87 фоизига тенг, деб хабар берди Reuters ва CNN Америка разведкасининг махфий ҳисоботига таяниб.
Разведка маълумотлари билан таниш манбаларнинг таъкидлашича, Кремлнинг шахсий таркиб ва зирҳли техникалардаги йўқотишлари Россия ҳарбий модернизациясини 18 йилга орқага сурган.
Америка разведкасида айтилишича, Россия Мудофаа вазирлиги босқинни 2022 йилнинг февралида 360 минг аскар билан бошлаган. Россия армиясида 3 500 та танк бўлган, шундан 2 200 таси йўқотилди. Бундан ташқари, 13 600 та пиёдалар жанговар машинаси ва бронетранспортёрдан 4 400 таси йўқотилди, бу эса 32 фоиз йўқотиш кўрсаткичини билдиради, дейилади разведка ҳисоботида.
12 декабрь куни АҚШ Миллий хавфсизлик кенгаши разведка маълумотларига таяниб, 2023 йилнинг октябрь — ноябрь ойларида Россия армияси фронтнинг энг қайноқ қисми — Авдеевкага ҳужум чоғида 13 минг нафар ҳарбий хизматчисидан ҳамда 220 дан ортиқ зирҳли техникасидан айрилгани ҳақида хабар берганди.
Россия расмийларининг таъкидлашича, Ғарбнинг урушда ҳалок бўлган руслар сони бўйича ҳисоб-китоблари жуда бўрттирилган, Украинанинг “катта” йўқотишлари эса доим кам баҳоланади.
Изоҳ (0)