Украина лагерида рус ҳарбий асирларига қандай озиқ-овқатлар берилиши маълум қилинди. Уларга давлат ҳисобидан колбаса ва шоколадлар берилиши жамиятда норозилик келтириб чиқарганди. Бу ҳақда “Фокус” нашри хабар берди.
“Агар фақат харидларга қарасангиз, давлат ҳарбий асирларни Snickers ва чўчқа ёғи билан озиқлантираётгандек таассурот пайдо бўлиши мумкин. Лекин бундай эмас”, — дейди Ҳарбий асирлар билан мулоқот қилиш бўйича мувофиқлаштирувчи штаб вакили Пётр Яценко.
Унинг сўзларига кўра, лагердаги рацион нонушта ва тушликдан иборат. Тушлик пайтида биринчи таом сифатида уларга карам ёки нўхат шўрва берилади, иккинчисига сариёғли бўтқа, бир бўлак гўшт ёки балиқ ва мавсумий салат — бу тузланган карам ёки винегрет бўлиши мумкин.
Ҳарбий асирларнинг ўзи кўкат, сабзавот етиштириб, нон пиширади. Уларнинг кундалик рационида ширинликлар, печене ёки чўчқа ёғи мавжуд эмас. Давлат муассасалари лагер дўконлари учун ширинликлар ва колбаса сотиб олади, маҳкумлар ўз маблағлари ҳисобидан озиқ-овқат харид қилиши мумкин.
Лагерда дўконларнинг бўлиши Женева конвенция сининг талабидир. Маҳсулотлар маҳкумларнинг илтимосига биноан сотиб олинади. Шунингдек, музлаткичларида дўконларда сотиб олган нарсаларни сақлаш учун алоҳида жойлар мавжуд.
“Дўконда печенье, чўчқа ёғи, газланган ичимликлар, гигиена воситалари бор. Ошхонада буларни беришмайди. Улар бюджетдан эмас, лагернинг махсус жамғармасидан сотиб олинади. Маҳкумларнинг яқинлари уларнинг шахсий ҳисобларига пул ўтказади. Шундан сўнг улар дўконда озиқ-овқат сотиб олиши мумкин”, — деди Яценко.
Лагер дўкони фаолиятидан олинган даромадлар махсус лагер фондига ўтказилиши ва шароитларни яхшилашга — колония биноларини таъмирлашга сарфланиши таъкидланди.
Изоҳ (0)