Тошкент вилояти Тошкент туманида жойлашган манзарали боғдорчилик ва ўрмон илмий-тажриба хўжалиги (халқ тилидаги “Дендропарк”) ҳудудида яшиллик даражаси қисқараётгани аниқланганди. Бош прокуратура матбуот хизмати ҳолат юзасидан жиноят иши қўзғатилганини маълум қилди.
Тегишли идоралар билан ҳамкорликда “Дендропарк” ҳудудидаги ўсимликлар дунёси аҳволи аэрокосмик таҳлил асосида ўрганилганди. Ўрганишда Тошкент вилояти Тошкент туманида жойлашган “Дархон” илмий-тажриба станцияси (“Дендропарк”) ер майдонлари мутахассислар иштирокида кўздан кечирилиб, дарахтларни нобуд қилиш, ер ажратиш ва ундан фойдаланиш қоидаларини бузиш билан боғлиқ кўплаб ҳолатлар аниқланган.
Хусусан, ҳудудда турли фуқаролар ва хўжалик юритувчи субъектлар томонидан манзарали боғдорчилик ва ўрмон соҳасига алоқаси бўлмаган хўжалик фаолияти олиб борилаётгани аниқланган, кўплаб капитал қурилишлар амалга оширилган. Дарахтларнинг парваришига масъулиятсизлик билан ёндашилгани оқибатида 103 туп ёнғоқ дарахти қуриб қолган, 85 туп кўп йиллик ёнғоқ дарахти кесилиб, илдизи билан қўпориб олинган.
.jpg)
.jpg)
Мазкур ҳолатлар юзасидан Жиноят кодексининг 198 (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) ва 205 (ҳокимият ёки мансаб ваколатини суиистеъмол қилиш) моддалари билан жиноят иши қўзғатилди.
Тергов ҳаракатлари ўтказилмоқда.
Изоҳ (0)