Фарғона вилоятида “Долзарб 40 кунлик” доирасида ўтказилган тезкор тадбирда гуруҳбозликка алоқадор 25 нафардан ортиқ шахс безорилик устида ушланиб, уларнинг фаолиятига чек қўйилди.
Вилоят ИИБ матбуот хизматининг хабар қилишича, ҳуқуқни муҳофаза қилувчи органлар билан ҳамкорликда тезкор вазият барқарорлигини таъминлаш ҳамда жиноятчиликни жиловлаш бўйича ўтказилган тезкор-қидирув ва профилактик тадбирлар давомида тезкор вазиятга салбий таъсир кўрсатувчи 298 кишининг яшаш манзилларида комплекс тезкор-қидирув тадбирлари ўтказилди.
Тадбирлар давомида 96 та жиноят аниқланди. Жиноят содир этиб, суд ва тергов органларидан яширинган 50 нафар қидирувдаги шахс ушланди.
Ўтказилган тадбирлар натижасида, 5 кило 921 грамм гиёҳвандлик воситалари, 414 дона психотроп ва кучли таъсир қилувчи моддалар, 42 та қурол-яроқ, 221 та ўқ-дорилар, 61 дона турли жиноятга дахлдор материаллар тайёрланган компьютер, телефон ҳамда тақиқланган диний адабиётлар аниқланиб ашёвий далил тариқасида олинди.
Мисол учун, Тошлоқ туманида ўтказилган тезкор тадбир давомида, фуқаро ўз хонадонида 8 дона жанговар ов қуроли ўқ дорилари, 61 дона гилзалар, 400 грамм порох, 140 дона 5,6 мм калибрли жанговар ўқ-дорилар қонунга хилоф равишда сақлаб келингани аниқланган.
Шунингдек, 9 декабрь куни тезкор ходимлар томонидан ўтказилган тадбирлар натижасида, муқаддам Жиноят кодексининг 164 (босқинчилик), 165 (товламачилик), 166 ҳамда (талончилик) 277-моддалари (безорилик) билан судланган, Марғилон шаҳрида яшовчи 1988 йилда туғилган, тезкор вазиятга салбий таъсир кўрсатиб келган, жиноий тажовузкор Каримов Абдулло Қосимжонович, шахсга оғир тан жароҳати етказиб, яшириниб юргани аниқланиб, ушланган.
Изоҳ (0)