Германиянинг Porsche компанияси актёр Пол Уокер автоҳалокат натижасида вафот этгани юзасидан масъулиятни зиммасига олишдан бош тортди. Компания Уокернинг қизи Мидоу Рейннинг суд шикоятига жавобан ОАВларга юборган баёнотни The Guardian нашри чоп этди.
«Компаниямиз автомобилларида кимдир аварияга учраганида, биз доим ачинамиз, бироқ ҳозирги вазиятда фожиа хавфли тарзда ҳайдаш ва тезликни ошириш туфайли содир бўлган», — дейилади Porsche изоҳида. Компания вакиллари полиция ва экспертлар зарур текширувларни ўтказиб бўлганини таъкидлади.
29 сентябрь куни марҳум актёр Пол Уокернинг ягона қизи Porsche автомобиль компаниясини судга берган эди. 17 ёшли Мидоу Рейн Porsche Carrera GT спорт машинасининг камчиликлари бўлмаганда, унинг отаси тирик қолиши мумкин эди, деб ҳисобламоқда.
Эслатиб ўтамиз, Пол Уокер 2013 йил 30 ноябрь куни Лос-Анжелесда содир бўлган автоҳалокат натижасида ҳаётдан кўз юмган. Машинани бошқарган Рожер Родаснинг турмуш ўртоғи ҳам Porsche’ни судга берган, бироқ компания барча айбларни Родасга ағдарган эди.
Изоҳ (0)