Ўзбекистонда истеъмолчиларга табиий газ тўлиқ ҳажмда етказиб берилмоқда, етишмовчиликлар кузатилмаяпти. Бу ҳақда “Ҳудудгазтаъминот” компанияси маълум қилди.
Қайд этилишича, ҳаво ҳароратининг кескин пасайиши муносабати билан бутун мамлакат бўйича табиий ва суюлтирилган газ истеъмолининг ортиши кузатилмоқда. Истеъмолчилар ўртасида ёнилғини тенг тақсимлаш мақсадида “Ҳудудгазтаъминот” АЖ мутахассислари 24 соатлик режимда иш олиб бормоқда.
Компанияга кўра, ҳозирги вақтда табиий газ истеъмолчиларига “зангори ёнилғи” тўлиқ ҳажмда етказиб берилмоқда, етишмовчиликлар кузатилмаяпти. Олис ҳудудларга суюлтирилган газ тўлиқ ҳажмда ва маҳаллий ҳокимият томонидан тасдиқланган график асосида етказилмоқда.
2023 йилнинг 9 декабрь куни газ таъминоти ташкилотлари томонидан аҳоли ва улгуржи истеъмолчиларга 105 миллион куб метр табиий газ етказиб берилган. Бундан ташқари суюлтирилган газ истеъмолчиларига 2 224 тонна ёнилғи етказилган.
“Ҳудудгазтаъминот” АЖ тизими мутахассислари барча таклиф, шикоят ва мурожаатларни 1104 телефон рақами орқали, газ сизиб чиқиши ҳолатлари, фавқулодда вазиятларни ва бошқа техник муаммоларни бартараф этиш бўйича аризаларни 104 рақами орқали қабул қилмоқда.
Ноқулай об-ҳаво шароитларига қарамай истеъмолчиларнинг газ таъминотини яхшилаш ишлари давом эттирилмоқда. Мазкур даврда алоҳида маҳалла ва хонадонларда газ етишмовчилигини олдини олиш мақсадида, “Ҳудудгазтаъминот” АЖ фуқаролардан газ жиҳозларидан фақат бирламчи заруриятлар учун фойдаланишни, уйдан чиқиб кетаётганда имкон қадар иситиш жиҳозларини ўчиришни сўрайди, — дейилади хабарда.
Эслатиб ўтамиз, 8 декабрдан Ўзбекистондаги барча метан заправкаларга соат 06:00 дан 15:00 га қадар чеклов киритилди. “Мазкур вақтинчалик чеклов аҳоли истеъмолчилари ҳамда ижтимоий объектларни табиий газ билан бир маромда таъминлаш мақсадида айни пайтгача республикамизнинг барча ҳудудида киритилди”, — дейилади хабарда.
Изоҳ (0)