Самарқандда оҳак ишлаб чиқариш корхонаси табиий газдан ноқонуний фойдаланиб келгани аниқланди.
Маълум қилинишича, ДХХ Самарқанд вилояти бўйича бошқармаси ходимлари томонидан тезкор тадбир ўтказилган. Тадбирда Пахтачи туманидаги хусусий корхона раҳбари зарур ҳужжатларни расмийлаштирмасдан, ҳукумат қарори талабларига зид равишда, техник шартда кўрсатилган лойиҳадан ташқари ўзбошимчалик билан газ қувури ўтказиб, табиий газдан фойдаланиш қоидаларини бузган ва оҳак ишлаб чиқариб келаётгани аниқланган.
“Ўзэнергоинспекция”нинг Самарқанд вилоят бўлими томонидан берилган хулосага кўра, мазкур корхона 387 245 метр куб табиий газдан ноқонуний фойдаланиб келгани натижасида давлат манфаатларига 580 миллион сўмлик зарар етказган.
Ҳолат юзасидан Жиноят кодексининг 169-моддаси (ўғрилик) 4-қисми “а” банди билан жиноят иши қўзғатилган.
Аввалроқ Жиззах шаҳридаги МЧЖ 3 млрд 840 млн сўм ёки 19 200 та хонадоннинг бир ойлик истеъмолига тенг миқдордаги табиий газдан ноқонуний фойдалангани аниқланганди. Шунингдек, Тошкентда салкам 530 млн сўмлик газдан ноқонуний фойдаланилгани, Ўзбекистонда бир ойда электр ва газдан ноқонуний фойдаланиш оқибатида тизимга қанча зарар етгани тўғрисида хабар берилган эди.
Изоҳ (0)