Ўзбекистонда 2023 йилнинг ўтган даврида автомобилларга газ тўлдириш компрессор шохобчалари томонидан 110,4 млрд сўмга тенг табиий газ ўғирланган. Бу ҳақда Бош прокуратура матбуот хизмати хабар берди.
Қайд этилишича, автомобилларга газ тўлдириш компрессор шохобчалари фаолияти юзасидан ҳуқуқ-тартибот органлари томонидан назорат тадбирларида 38 та корхона томонидан 110,4 миллиард сўмга тенг бўлган 98,8 миллион куб табиий газ ўғирлангани аниқланган.
Жамият ва таъминотчи корхона мансабдор шахсларига нисбатан Жиноят кодексининг тегишли моддалари билан жиноят ишлари қўзғатилиб, улар процессуал тартибда ушланган.
“Автомобильларга газ тўлдириш компресслаш фаолияти билан ноқонуний шуғулланиб, табиий газни жуда кўп миқдорда талон-торож қилиш Жиноят кодексининг 169-моддаси 4-қисми (ўғрилик) билан жиноят иши қўзғатилишига ҳамда саккиз йилдан ўн беш йилгача озодликдан маҳрум қилиш билан жазо тайинланиши мумкин”, — деб эслатиб ўтди Бош прокуратура матбуот хизмати.
Айни пайтда мазкур йўналишда назорат тадбирлари давом этмоқда.
Изоҳ (0)