Тошкент метрополитенининг “Пахтакор” бекатида поезд узоқ вақт тўхтаб қолгани акс этган видеолар тарқалди. “Тошкент метрополитени” ДУК ҳолат бўйича тушунтириш берди.
Маълум қилинишича, 7 декабрь санаси соат 18:38 да “Пахтакор” бекатидан ҳаракатланиши лозим бўлган 26-сонли ҳаракат таркибининг вагонларига йўловчиларнинг кириш ва чиқиш вақтлари меъёридан ортиб (10 сония) кетган.
Бунинг натижасида ушбу ҳаракат таркиби бекатдан белгиланган вақтдан кечроқ ҳаракатланишга сабаб бўлган. Оқибатда эса ортдан келаётган 2-сонли ҳаракат таркиби белгиланган йўриқномага асосан “Пахтакор” бекатининг кириш светофорининг тақиқловчи сигналида 27 сония вақт давомида тўхтаб турган.
26-сонли ҳаракат таркиби бекатни тарк этганидан сўнг, светофорнинг рухсат берувчи кўрсаткичи ёнган ва 2-сонли ҳаракат таркиби ҳаракатни давом эттирган.
“Шу ўринда йўловчилардан метро хизматидан фойдаланишда тартиб-қоидаларга риоя этишларини ва бу орқали йўловчиларга маданиятли хизмат кўрсатилишида яқиндан ёрдам беришларини яна бир бор эслатиб ўтамиз”, — дейилади хабарда.
Изоҳ (0)