Toshkent metropolitenining “Paxtakor” bekatida poyezd uzoq vaqt to‘xtab qolgani aks etgan videolar tarqaldi. “Toshkent metropoliteni” DUK holat bo‘yicha tushuntirish berdi.
Maʼlum qilinishicha, 7-dekabr sanasi soat 18:38 da “Paxtakor” bekatidan harakatlanishi lozim bo‘lgan 26-sonli harakat tarkibining vagonlariga yo‘lovchilarning kirish va chiqish vaqtlari me’yoridan ortib (10 soniya) ketgan.
Buning natijasida ushbu harakat tarkibi bekatdan belgilangan vaqtdan kechroq harakatlanishga sabab bo‘lgan. Oqibatda esa ortdan kelayotgan 2-sonli harakat tarkibi belgilangan yo‘riqnomaga asosan “Paxtakor” bekatining kirish svetoforining taqiqlovchi signalida 27 soniya vaqt davomida to‘xtab turgan.
26-sonli harakat tarkibi bekatni tark etganidan so‘ng, svetoforning ruxsat beruvchi ko‘rsatkichi yongan va 2-sonli harakat tarkibi harakatni davom ettirgan.
“Shu o‘rinda yo‘lovchilardan metro xizmatidan foydalanishda tartib-qoidalarga rioya etishlarini va bu orqali yo‘lovchilarga madaniyatli xizmat ko‘rsatilishida yaqindan yordam berishlarini yana bir bor eslatib o‘tamiz”, — deyiladi xabarda.
Izoh (0)