Қозоғистоннинг Атирау вилояти ихтисослаштирилган хўжалик суди урушдан жабрланганларга гуманитар ёрдам кўрсатувчи “Украинага шон-шараф” жамғармасини тугатиш тўғрисида қарор қабул қилди. Бу ҳақда Инсон ҳуқуқлари бўйича Қозоғистон халқаро бюроси хабар берди.
Ушбу қарор билан суд вилоят адлия бошқармасининг даъвосини қаноатлантирди, деб маълум қилди бюро.
Идора маълумотларига кўра, даъвогар томон жамғарма устави қонунга тўғри келмаслигини таъкидлаб, бу қоидабузарликлар “тузатиб бўлмас” эканини билдирган.
Жамғарма 10 августда рўйхатдан ўтган, аммо 25 август куни Адлия вазирлиги уни давлат рўйхатидан ўтказишни бекор қилиш тўғрисида даъво аризаси билан мурожаат қилган, дейди ҳуқуқ ҳимоячилари.
Жамғарма раҳбари Турарбек Кусаиновнинг бюрога маълум қилишича, унинг ташкилоти ўз фаолияти даврида Украинага 11 минг долларлик гуманитар ёрдам йиғиб, жўнатишга муваффақ бўлган.
Россия президенти Владимир Путин 2022 йил 24 февралда Украинада “махсус ҳарбий операция” бошланганини эълон қилди. Март ойида Олмаотада Украинани қўллаб-қувватлаш бўйича келишилган митинг бўлиб ўтди, унда бир неча минг киши қатнашди. Бундан ташқари, Қозоғистонда ўнлаб кичик норозилик намойишлари бўлиб ўтди. Бироқ сўнгги бир йил ичида бундай митингларни ўтказиш тўғрисидаги барча билдиришномалар Қозоғистон расмийларининг қаршилигига учради, деб таъкидлайди ҳуқуқ ҳимоячилари.
Изоҳ (0)