Қозоғистон ташқи ишлар вазири ўринбосари Роман Василенко мамлакатнинг Украинадаги уруш бўйича позициясини билдирди. Сиёсатчи Германиянинг Deutsche Welle нашрига берган интервьюсида бу ҳақда гапирди.
Журналист вазир ўринбосаридан Қозоғистоннинг халқаро сиёсати кўпинча кўп векторли деб аталиши, аммо ҳозирги вазият, жумладан, Россия ва Украина ўртасидаги уруш, Ғарбнинг Россияга қарши санкцияларида бу қандай қўл келаётганини сўради.
“Қандай қилиб Қозоғистон Россия, Хитой ва Европа билан дўстона муносабатда бўлиб қолишга муваффақ бўлмоқда?”, — деб сўради журналист.
Расмий ташриф билан Берлинда бўлган Роман Василенко Қозоғистон кўп векторли, мувозанатли, прагматик ташқи сиёсат юритаётгани, мустақиллик йилларида бу давлат учун бошқа альтернатива йўқлигини исботлаганини айтди.
“Биз бу вазиятда (Россия-Украина конфликт) позициямизни жуда аниқ белгилаб олдик. Бу БМТ Низоми асосида давлатлар ҳудудий яхлитлигини ҳурмат қилиш заруратидан иборат. Шу жумладан, албатта, Украинани. Бу позиция ҳамма ҳамкорларимиз учун тушунарли. Биз Россия, Америка ёки Хитой тарафидаги позицияни эгалламаслигимизни аниқ айтамиз. Позициямиз Қозоғистон тараф, бизнинг миллий ташқи сиёсатимиз остида миллий манфаатларимиз ётади”, — деди ташқи ишлар вазири ўринбосари.
Бундан ташқари, у нега Қозоғистон Россиянинг Украинага бўлган тажовузини ёки ҳарбий жиноятларни аниқ қораламаганига аниқлик киритди.
“Қозоғистон ўз позициясини аниқ белгилаб олди. Бу БМТ Низоми асосида барча давлатларнинг, жумладан, Украинанинг ҳам ҳудудий яхлитлигини ҳурмат қилиш заруратидан иборат. 20 миллион аҳоли, жумладан, 3,5 миллион руслар, 250 минг этник украинга эга Қозоғистон учун бу жуда яқин тўқнашув, фожиали уруш.
Шунинг учун Қозоғистон қон тўкилишини тўхтатиш ва можарони ҳал қилишга ҳисса қўшиш учун бор кучи билан ҳаракат қилмоқда. Қосим-Жўмарт Тўқаев бир неча бор Қозоғистон Россия ва Украина томонидан талаб қилинса, воситачи бўлишини айтган”, — деди Роман Василенко.
Унинг қўшимча қилишича, ҳозирча воситачи бўлиш таклифи келиб тушмаган, бироқ томонлар сўраса, Қозоғистон бу ролда ҳаракат қилишга тайёр. Ташқи ишлар вазири ўринбосари Украинада ҳам, Россияда ҳам кучли реакцияга сабаб бўлган “бузилмас ўтовлар” лойиҳаси ҳақида ҳам фикр билдирди.
“Қозоғистон Украинага инсонпарварлик ёрдамини, жумладан, генераторлар, озиқ-овқат ва дори-дармонларни етказиб бериш шаклида кўрсатди. Бу мавзу Қозоғистон жамиятида жуда фаол муҳокама қилинди ва унинг энг фаол вакиллари турли акцияларда иштирок этди, жумладан, гуманитар ёрдам жўнатиш, бузилмас ўтовларни ўрнатиш. Қозоқлар учун ўтов муқаддас, кўчмас уй. Шунинг учун жамиятимизда бу қадамлар жуда яхши қабул қилинди”, — деди Василенко.
Изоҳ (0)